Якутиядан келген бойжеткен Алматы қаласы туралы әсерімен бөлісті. Ол мегаполистің басты ерекшеліктерінің бірі ретінде қала өмірі мен табиғаттың үйлесімін атап өтті. Бұл туралы ол желіде видео жариялады, деп хабарлайды “Адырна”.
Автордың айтуынша, Алматыда небәрі 30 минут ішінде тауға жетуге болады. Бұл қала тұрғындарына таза ауада серуендеп, тыныштық пен табиғат аясында демалуға мүмкіндік береді. Оның пікірінше, дәл осындай контраст — қарбалас мегаполис пен көркем таулы аймақтың жақындығы — Алматыны өзгеше етеді.
Сондай-ақ, ол алматылықтардың өмір салтына назар аударды. Қала тұрғындары кез келген сәтте динамикалық ортадан шығып, табиғат құшағына ене алады. Бұл мүмкіндік, оның сөзінше, көптеген ірі қалаларда кездесе бермейді.
«Алматылықтар, сіздер ең бақытты адамдарсыздар», — деп атап өтті бойжеткен. Ол мұндай жағдайды «сирек кездесетін артықшылық» деп бағалады.
