Қазақстанда атом электр стансасында болуы мүмкін төтенше жағдайларға дайындық мақсатында құтқарушылар үшін оқу-жаттығулар ұйымдастырылды, деп хабарлайды "Адырна".
11-15 тамыз аралығында Өскемен қаласында Төтенше жағдайлар министрлігі, Атом энергиясы жөніндегі агенттік пен Шығыс Қазақстан облысының әкімдігі бірлесіп ұйымдастырған «Қалқан-2025» бірлескен командалық-штабтық оқу-жаттығулар өтті.
«Іс-шара Қазақстанда салынатын атом электр станциясының құрылысы қарсаңында азаматтық қорғау жүйесін жетілдіру, ведомствоаралық өзара іс-қимылдың тиімділігін арттыру және қауіпсіздіктің халықаралық стандарттарын енгізу жөніндегі кешенді шаралардың бір бөлігі болды», - деп мәлімдеді ҚР Атом энергиясы жөніндегі агенттігі.
Оқу-жаттығу барысында түрлі сценарийлер ойластырылып, мемлекеттік органдар, зауыттар, ауруханалар мен жергілікті билік бір-бірімен қалай жұмыс істейтіні пысықталған.
Агенттік атап өткендей, «Қалқан-2025» оқу-жаттығулары Қазақстан атом энергетикасы саласында заманауи технологияларды қолдануға және маңызды нысандарды қауіпсіз пайдалануға дайын екенін көрсеткен.
