Каспий теңізінің түбімен мұнай және газ құбырларының тартылмауы жаһандық тұрақсыздық жағдайында Орталық Азия елдері үшін маңызды геоэкономикалық мәселелердің бірі болып отыр. Бұл туралы Қазақстандағы Азиялық зерттеулер институты директоры Сұлтан Әкімбеков Бакуде өткен “C6: Бірыңғай өңір, ортақ болашақ – стратегиялық диалогты күшейту” атты халықаралық конференцияда мәлімдеді, деп хабарлайды “Адырна”.
Оның айтуынша, бұл мәселе көбіне Каспий теңізінің түбімен құбыр тартуға қарсы болған Ресейдің ұстанымымен байланысты.
«Бізде мұндай мұнай құбыры жоқ, сондықтан Ресей мен Украина арасындағы соғыс басталғаннан кейін Каспий құбыр консорциумымен (КТК) байланысты қиындықтар туындады. Түрікменстанда да газ құбыры жоқ, дегенмен бұл жөнінде әңгімелер өте белсенді түрде жүргізілген еді», – деді ол.
Сарапшының пікірінше, C6 форматы көлік дәліздерін қалыптастыруға байланысты үдерістерді дамыту бағыттарының бірі бола алады.
«Жуырда КТК терминалдарына жасалған шабуылдардан кейін Қазақстан өте күрделі дағдарысқа тап болды. Қазіргі таңда біз бұл мәселені Баку – Тбилиси – Джейхан бағыты арқылы өтей алмаймыз, өйткені Каспий арқылы қажетті көлік қуаттары жоқ», – деп мәлімдеді Әкімбеков.
Ол сондай-ақ C6 елдері үшін негізгі қауіпсіздік сын-қатерлері Каспий теңізі төңірегіндегі күрделі геосаяси жағдаймен байланысты екенін атап өтті.
«Бүгінгі көптеген мәселелер Каспий теңізінің құқықтық мәртебесінің толық реттелмеуінен және Ресей мен АҚШ арасындағы ықпал үшін күреске байланысты күрделі геосаяси жағдайдан туындап отыр», – деп түйіндеді сарапшы.
