كاسپي تەڭىزىنىڭ تۇبىمەن مۇناي جانە گاز قۇبىرلارىنىڭ تارتىلماۋى جاھاندىق تۇراقسىزدىق جاعدايىندا ورتالىق ازيا ەلدەرى ءۇشىن ماڭىزدى گەوەكونوميكالىق ماسەلەلەردىڭ ءبىرى بولىپ وتىر. بۇل تۋرالى قازاقستانداعى ازيالىق زەرتتەۋلەر ينستيتۋتى ديرەكتورى سۇلتان اكىمبەكوۆ باكۋدە وتكەن “C6: بىرىڭعاي ءوڭىر، ورتاق بولاشاق – ستراتەگيالىق ديالوگتى كۇشەيتۋ” اتتى حالىقارالىق كونفەرەنتسيادا مالىمدەدى، دەپ حابارلايدى “ادىرنا”.
ونىڭ ايتۋىنشا، بۇل ماسەلە كوبىنە كاسپي تەڭىزىنىڭ تۇبىمەن قۇبىر تارتۋعا قارسى بولعان رەسەيدىڭ ۇستانىمىمەن بايلانىستى.
«بىزدە مۇنداي مۇناي قۇبىرى جوق، سوندىقتان رەسەي مەن ۋكراينا اراسىنداعى سوعىس باستالعاننان كەيىن كاسپي قۇبىر كونسورتسيۋمىمەن (كتك) بايلانىستى قيىندىقتار تۋىندادى. تۇرىكمەنستاندا دا گاز قۇبىرى جوق، دەگەنمەن بۇل جونىندە اڭگىمەلەر وتە بەلسەندى تۇردە جۇرگىزىلگەن ەدى»، – دەدى ول.
ساراپشىنىڭ پىكىرىنشە، C6 فورماتى كولىك دالىزدەرىن قالىپتاستىرۋعا بايلانىستى ۇدەرىستەردى دامىتۋ باعىتتارىنىڭ ءبىرى بولا الادى.
«جۋىردا كتك تەرمينالدارىنا جاسالعان شابۋىلداردان كەيىن قازاقستان وتە كۇردەلى داعدارىسقا تاپ بولدى. قازىرگى تاڭدا ءبىز بۇل ماسەلەنى باكۋ – تبيليسي – دجەيحان باعىتى ارقىلى وتەي المايمىز، ويتكەنى كاسپي ارقىلى قاجەتتى كولىك قۋاتتارى جوق»، – دەپ مالىمدەدى اكىمبەكوۆ.
ول سونداي-اق C6 ەلدەرى ءۇشىن نەگىزگى قاۋىپسىزدىك سىن-قاتەرلەرى كاسپي تەڭىزى توڭىرەگىندەگى كۇردەلى گەوساياسي جاعدايمەن بايلانىستى ەكەنىن اتاپ ءوتتى.
«بۇگىنگى كوپتەگەن ماسەلەلەر كاسپي تەڭىزىنىڭ قۇقىقتىق مارتەبەسىنىڭ تولىق رەتتەلمەۋىنەن جانە رەسەي مەن اقش اراسىنداعى ىقپال ءۇشىن كۇرەسكە بايلانىستى كۇردەلى گەوساياسي جاعدايدان تۋىنداپ وتىر»، – دەپ تۇيىندەدى ساراپشى.
