Иран билігі Үндістанмен өткен келіссөздер барысында Ормуз бұғазы арқылы кемелердің қауіпсіз өтуіне қатысты бірқатар талап қойды. Бұл туралы дереккөздерге сілтеме жасап Reuters агенттігі жариялады, деп хабарлайды "Адырна".
Ақпаратқа сәйкес, ирандық келіссөз жүргізушілер Үндістаннан ақпан айында ұсталған үш танкерді қайтаруды талап еткен. Тегеран бұл талап орындалған жағдайда ғана кемелердің Ормуз бұғазы арқылы қауіпсіз өтуін қамтамасыз етуге дайын екенін мәлімдеген.
Келіссөздер барысында Иран тағы бір шарт ұсынған. Атап айтқанда, елге кейбір дәрі-дәрмек пен медициналық жабдықтарды жеткізу мәселесі көтерілген. Иран тарапының айтуынша, бұл өнімдер елге қазіргі күрделі жағдайға байланысты аса қажет.
Жергілікті шенеуніктердің мәліметінше, медициналық жабдықтарға деген сұраныс Иранның АҚШ және Израильмен жалғасып жатқан қақтығысы аясында күшейген. Осыған байланысты Тегеран келіссөздер барысында гуманитарлық сипаттағы жеткізілімдерді де басты талаптардың бірі ретінде көтерген.
