يران بيلىگى ۇندىستانمەن وتكەن كەلىسسوزدەر بارىسىندا ورمۋز بۇعازى ارقىلى كەمەلەردىڭ قاۋىپسىز وتۋىنە قاتىستى بىرقاتار تالاپ قويدى. بۇل تۋرالى دەرەككوزدەرگە سىلتەمە جاساپ Reuters اگەنتتىگى جاريالادى، دەپ حابارلايدى "ادىرنا".
اقپاراتقا سايكەس، يراندىق كەلىسسوز جۇرگىزۋشىلەر ءۇندىستاننان اقپان ايىندا ۇستالعان ءۇش تانكەردى قايتارۋدى تالاپ ەتكەن. تەگەران بۇل تالاپ ورىندالعان جاعدايدا عانا كەمەلەردىڭ ورمۋز بۇعازى ارقىلى قاۋىپسىز ءوتۋىن قامتاماسىز ەتۋگە دايىن ەكەنىن مالىمدەگەن.
كەلىسسوزدەر بارىسىندا يران تاعى ءبىر شارت ۇسىنعان. اتاپ ايتقاندا، ەلگە كەيبىر ءدارى-دارمەك پەن مەديتسينالىق جابدىقتاردى جەتكىزۋ ماسەلەسى كوتەرىلگەن. يران تاراپىنىڭ ايتۋىنشا، بۇل ونىمدەر ەلگە قازىرگى كۇردەلى جاعدايعا بايلانىستى اسا قاجەت.
جەرگىلىكتى شەنەۋنىكتەردىڭ مالىمەتىنشە، مەديتسينالىق جابدىقتارعا دەگەن سۇرانىس يراننىڭ اقش جانە يزرايلمەن جالعاسىپ جاتقان قاقتىعىسى اياسىندا كۇشەيگەن. وسىعان بايلانىستى تەگەران كەلىسسوزدەر بارىسىندا گۋمانيتارلىق سيپاتتاعى جەتكىزىلىمدەردى دە باستى تالاپتاردىڭ ءبىرى رەتىندە كوتەرگەن.
