Журналистер сот үкімі шыққан аталған блогерлердің рақымшылыққа ілінуі мүмкін бе деген сұрақ қойған.
Вице-министр бұл мәселеге нақты жауап беріп, олардың рақымшылық санатына жатпайтынын айтты.
«Жанәбіловтар бойынша жауап біржақты: жоқ. Олар рақымшылыққа жатпайды. Оларға қатысты қылмыстық жауапкершіліктен босату түріндегі де, жазаны қысқарту түріндегі де рақымшылық қолданылмайды. Аталған бап бойынша оларға рақымшылық тікелей қолданылмайды», – деді Санжар Әділов.
Еске салайық, 2026 жылғы 27 сәуірде Астана қаласында блогерлер Ерболат Жанәбілов пен Эльмира Төлегеноваға қатысты сот үкімі шыққан болатын.
Сот шешімімен Ерболат Жанәбілов Қылмыстық кодекстің 214-бабы 2-бөлігі 2-тармағы («Заңсыз кәсіпкерлік») және 218-бабы 2-бөлігі 1-тармағы («Қылмыстық жолмен алынған ақшаны немесе өзге мүлікті заңдастыру») бойынша кінәлі деп танылып, 2 жылға бас бостандығынан айыру жазасы тағайындалған. Алайда сот Қылмыстық кодекстің 63-бабы 1-бөлігіне сәйкес жазаны шартты деп танып, пробациялық бақылау белгіледі.
Ал Эльмира Төлегенова да осы баптар бойынша кінәлі деп танылып, 2 жылға бас бостандығынан айыру жазасына кесілген. Сот шешімімен жазаны өтеу мерзімі 2 жылға кейінге қалдырылып, мүлкі тәркіленген.
