جۋرناليستەر سوت ۇكىمى شىققان اتالعان بلوگەرلەردىڭ راقىمشىلىققا ءىلىنۋى مۇمكىن بە دەگەن سۇراق قويعان.
ۆيتسە-مينيستر بۇل ماسەلەگە ناقتى جاۋاپ بەرىپ، ولاردىڭ راقىمشىلىق ساناتىنا جاتپايتىنىن ايتتى.
ء«جانابىلوۆتار بويىنشا جاۋاپ بىرجاقتى: جوق. ولار راقىمشىلىققا جاتپايدى. ولارعا قاتىستى قىلمىستىق جاۋاپكەرشىلىكتەن بوساتۋ تۇرىندەگى دە، جازانى قىسقارتۋ تۇرىندەگى دە راقىمشىلىق قولدانىلمايدى. اتالعان باپ بويىنشا ولارعا راقىمشىلىق تىكەلەي قولدانىلمايدى»، – دەدى سانجار ءادىلوۆ.
ەسكە سالايىق، 2026 جىلعى 27 ساۋىردە استانا قالاسىندا بلوگەرلەر ەربولات ءجانابىلوۆ پەن ەلميرا تولەگەنوۆاعا قاتىستى سوت ۇكىمى شىققان بولاتىن.
سوت شەشىمىمەن ەربولات ءجانابىلوۆ قىلمىستىق كودەكستىڭ 214-بابى 2-بولىگى 2-تارماعى («زاڭسىز كاسىپكەرلىك») جانە 218-بابى 2-بولىگى 1-تارماعى («قىلمىستىق جولمەن الىنعان اقشانى نەمەسە وزگە مۇلىكتى زاڭداستىرۋ») بويىنشا كىنالى دەپ تانىلىپ، 2 جىلعا باس بوستاندىعىنان ايىرۋ جازاسى تاعايىندالعان. الايدا سوت قىلمىستىق كودەكستىڭ 63-بابى 1-بولىگىنە سايكەس جازانى شارتتى دەپ تانىپ، پروباتسيالىق باقىلاۋ بەلگىلەدى.
ال ەلميرا تولەگەنوۆا دا وسى باپتار بويىنشا كىنالى دەپ تانىلىپ، 2 جىلعا باس بوستاندىعىنان ايىرۋ جازاسىنا كەسىلگەن. سوت شەشىمىمەن جازانى وتەۋ مەرزىمى 2 جىلعا كەيىنگە قالدىرىلىپ، مۇلكى تاركىلەنگەن.
