Фото: Us Navy/U.S. Navy/Planet Pix/ZUMA/picture alliance
27 маусым күні АҚШ Әуе күштері Иранның әскери бақылау инфрақұрылымына, байланыс жүйелеріне, әуе шабуылына қарсы қорғаныс нысандарына, дрондар қоймаларына және теңіз миналарын сақтау орындарына әуе соққыларын жасады. АҚШ Орталық қолбасшылығының (CENTCOM) мәліметінше, бұл әрекет Иранның коммерциялық кеме қатынасына қарсы шабуылдарына жауап ретінде жүзеге асырылған, деп хабарлайды “Адырна”.
«Кеше АҚШ-тың Иранның Ever Lovely кемесіне жасаған шабуылына жауап ретінде берген соққысынан кейін Иранға атысты тоқтату туралы келісімді сақтау мүмкіндігі берілді. Алайда ол мұны орындамады: бүгін Солтүстік Американың шығыс уақыты бойынша таңғы 4:30-да (Астана уақытымен 13:30) ирандық камикадзе-дрон Kiku танкеріне шабуыл жасады. Панама туымен жүзіп келе жатқан бұл танкер Ормуз бұғазы маңында екі миллионнан астам баррель шикі мұнай тасымалдап бара жатқан», – деп хабарлады CENTCOM X әлеуметтік желісінде.
АҚШ әскері Ормуз бұғазы арқылы сауда кемелерінің қозғалысы жалғасып жатқанын және АҚШ Қарулы күштері толық жауынгерлік дайындықта екенін мәлімдеді.
Кувейт армиясы X әлеуметтік желісінде елдің әуе қорғаныс күштері зымырандар мен дрондардың шабуылдарын тойтарып жатқанын хабарлады. Сонымен қатар, Иранның Press TV телеарнасы Бахрейнде жарылыстар болғанын мәлімдеді. Бахрейн Ішкі істер министрлігі елде әуе дабылы жарияланғанын хабарлап, тұрғындарды сабыр сақтап, қауіпсіз орындарға жасырынуға шақырды.
Иранның Ислам революциясы сақшылар корпусы (КСИР) Кувейт пен Бахрейнге жасалған шабуылдар үшін жауапкершілікті өз мойнына алды. Тегеран бұл шабуылдардың мақсаты АҚШ-тың әскери нысандары болғанын және олардың америкалық соққыларға жауап ретінде жасалғанын мәлімдеді.
26 маусым кешке CENTCOM Ормуз бұғазы арқылы өткен сауда кемесіне жасалған шабуылға жауап ретінде Иран аумағына соққы бергенін хабарлады. Ирандық БАҚ елдің оңтүстігіндегі Сирик қаласы мен Кешм аралында жарылыстар болғанын жазды.
Осыдан кейін КСИР Таяу Шығыстағы АҚШ әскери күштері орналасқан орындарға соққы жасағанын мәлімдеп, «агрессия қайталанса, бұдан да ауқымды жауап беретінін» ескертті. Тегеран мен Вашингтон бір-бірін бітімгершілік келісімін бұзды деп айыптады.
Ever Lovely кемесіне жасалған шабуыл 17 маусымда АҚШ пен Иран арасында қол қойылған, әскери әрекеттерді тоқтатуды және Ормуз бұғазындағы кеме қатынасын қалпына келтіруді көздейтін негіздемелік келісімнен кейінгі алғашқы оқиға болды. Бұл шабуыл КСИР қауіпсіз кеме қатынасы тек Иран бақылауындағы бағыттар арқылы қамтамасыз етілетінін мәлімдегеннен кейін бірнеше сағат өткен соң жасалды.
АҚШ президенті Дональд Трамп 27 маусым күні Иранға жаңа соққылар жасалғанын растады және мұны атысты тоқтату туралы келісімнің бұзылуымен түсіндірді.
«Енді сабыр сақтай алмайтын жағдай тууы мүмкін. Ондай жағдайда біз өте сәтті бастаған істі әскери жолмен толық аяқтауға мәжбүр боламыз. Егер солай болса, Иран Ислам Республикасы өмір сүруін тоқтатады!» – деп жазды Ақ үй басшысы Truth Social платформасында.
