فوتو: Us Navy/U.S. Navy/Planet Pix/ZUMA/picture alliance
27 ماۋسىم كۇنى اقش اۋە كۇشتەرى يراننىڭ اسكەري باقىلاۋ ينفراقۇرىلىمىنا، بايلانىس جۇيەلەرىنە، اۋە شابۋىلىنا قارسى قورعانىس نىساندارىنا، دروندار قويمالارىنا جانە تەڭىز مينالارىن ساقتاۋ ورىندارىنا اۋە سوققىلارىن جاسادى. اقش ورتالىق قولباسشىلىعىنىڭ (CENTCOM) مالىمەتىنشە، بۇل ارەكەت يراننىڭ كوممەرتسيالىق كەمە قاتىناسىنا قارسى شابۋىلدارىنا جاۋاپ رەتىندە جۇزەگە اسىرىلعان، دەپ حابارلايدى “ادىرنا”.
«كەشە اقش-تىڭ يراننىڭ Ever Lovely كەمەسىنە جاساعان شابۋىلىنا جاۋاپ رەتىندە بەرگەن سوققىسىنان كەيىن يرانعا اتىستى توقتاتۋ تۋرالى كەلىسىمدى ساقتاۋ مۇمكىندىگى بەرىلدى. الايدا ول مۇنى ورىندامادى: بۇگىن سولتۇستىك امەريكانىڭ شىعىس ۋاقىتى بويىنشا تاڭعى 4:30-دا (استانا ۋاقىتىمەن 13:30) يراندىق كاميكادزە-درون Kiku تانكەرىنە شابۋىل جاسادى. پاناما تۋىمەن ءجۇزىپ كەلە جاتقان بۇل تانكەر ورمۋز بۇعازى ماڭىندا ەكى ميلليوننان استام باررەل شيكى مۇناي تاسىمالداپ بارا جاتقان»، – دەپ حابارلادى CENTCOM X الەۋمەتتىك جەلىسىندە.
اقش اسكەرى ورمۋز بۇعازى ارقىلى ساۋدا كەمەلەرىنىڭ قوزعالىسى جالعاسىپ جاتقانىن جانە اقش قارۋلى كۇشتەرى تولىق جاۋىنگەرلىك دايىندىقتا ەكەنىن مالىمدەدى.
كۋۆەيت ارمياسى X الەۋمەتتىك جەلىسىندە ەلدىڭ اۋە قورعانىس كۇشتەرى زىمىراندار مەن درونداردىڭ شابۋىلدارىن تويتارىپ جاتقانىن حابارلادى. سونىمەن قاتار، يراننىڭ Press TV تەلەارناسى باحرەيندە جارىلىستار بولعانىن مالىمدەدى. باحرەين ىشكى ىستەر مينيسترلىگى ەلدە اۋە دابىلى جاريالانعانىن حابارلاپ، تۇرعىنداردى سابىر ساقتاپ، قاۋىپسىز ورىندارعا جاسىرىنۋعا شاقىردى.
يراننىڭ يسلام رەۆوليۋتسياسى ساقشىلار كورپۋسى (كسير) كۋۆەيت پەن باحرەينگە جاسالعان شابۋىلدار ءۇشىن جاۋاپكەرشىلىكتى ءوز موينىنا الدى. تەگەران بۇل شابۋىلداردىڭ ماقساتى اقش-تىڭ اسكەري نىساندارى بولعانىن جانە ولاردىڭ امەريكالىق سوققىلارعا جاۋاپ رەتىندە جاسالعانىن مالىمدەدى.
26 ماۋسىم كەشكە CENTCOM ورمۋز بۇعازى ارقىلى وتكەن ساۋدا كەمەسىنە جاسالعان شابۋىلعا جاۋاپ رەتىندە يران اۋماعىنا سوققى بەرگەنىن حابارلادى. يراندىق باق ەلدىڭ وڭتۇستىگىندەگى سيريك قالاسى مەن كەشم ارالىندا جارىلىستار بولعانىن جازدى.
وسىدان كەيىن كسير تاياۋ شىعىستاعى اقش اسكەري كۇشتەرى ورنالاسقان ورىندارعا سوققى جاساعانىن مالىمدەپ، «اگرەسسيا قايتالانسا، بۇدان دا اۋقىمدى جاۋاپ بەرەتىنىن» ەسكەرتتى. تەگەران مەن ۆاشينگتون ءبىر-ءبىرىن بىتىمگەرشىلىك كەلىسىمىن بۇزدى دەپ ايىپتادى.
Ever Lovely كەمەسىنە جاسالعان شابۋىل 17 ماۋسىمدا اقش پەن يران اراسىندا قول قويىلعان، اسكەري ارەكەتتەردى توقتاتۋدى جانە ورمۋز بۇعازىنداعى كەمە قاتىناسىن قالپىنا كەلتىرۋدى كوزدەيتىن نەگىزدەمەلىك كەلىسىمنەن كەيىنگى العاشقى وقيعا بولدى. بۇل شابۋىل كسير قاۋىپسىز كەمە قاتىناسى تەك يران باقىلاۋىنداعى باعىتتار ارقىلى قامتاماسىز ەتىلەتىنىن مالىمدەگەننەن كەيىن بىرنەشە ساعات وتكەن سوڭ جاسالدى.
اقش پرەزيدەنتى دونالد ترامپ 27 ماۋسىم كۇنى يرانعا جاڭا سوققىلار جاسالعانىن راستادى جانە مۇنى اتىستى توقتاتۋ تۋرالى كەلىسىمنىڭ بۇزىلۋىمەن ءتۇسىندىردى.
«ەندى سابىر ساقتاي المايتىن جاعداي تۋى مۇمكىن. ونداي جاعدايدا ءبىز وتە ءساتتى باستاعان ءىستى اسكەري جولمەن تولىق اياقتاۋعا ءماجبۇر بولامىز. ەگەر سولاي بولسا، يران يسلام رەسپۋبليكاسى ءومىر ءسۇرۋىن توقتاتادى!» – دەپ جازدى اق ءۇي باسشىسى Truth Social پلاتفورماسىندا.
