گازا سەكتورىندا سوعىستى توقتاتۋ تۋرالى كەلىسىمگە اقش، قاتار، ەگيپەت جانە تۇركيا قول قويدى، دەپ حابارلايدى "ادىرنا" ۇلتتىق پورتالى.
رەسمي قول قويۋ ءراسىمى ەگيپەتتىڭ شارم-ەش-شەيح قالاسىندا وتتى. ءىس-شاراعا اقش پرەزيدەنتى دونالد ترامپ، ەگيپەت باسشىسى ابدەل فاتتاح اس-سيسي، تۇركيا پرەزيدەنتى رەجەپ تايپ ەردوعان جانە كاتار ءامىرى تاميم بين حاماد ءال تاني قاتىستى.
ترامپ بۇل كەلىسىمدى «بۇكىل تاياۋ شىعىس ءۇشىن جاڭا باستاۋ» دەپ اتادى.
ء«بىز بۇگىن اتاپ ءوتىپ وتىرعان بۇل تاريحي قادام — گازا سوعىسىنىڭ اياقتالۋى عانا ەمەس. بۇل — تەررور جولىنان تۇبەگەيلى باس تارتقان جاڭا، تۇراقتى جانە ءبىرتۇتاس ءوڭىردىڭ باستاۋى»، — دەدى ول Reuters اگەنتتىگىنە بەرگەن مالىمدەمەسىندە.
كەلىسىمنىڭ العاشقى كەزەڭىندە حاماس يزرايلدىك تۇتقىنداردى بوساتىپ، ال يزرايل پالەستينالىق تۇتقىنداردى بوساتقان. قۇجاتتا بەيبىتشىلىك ورناتۋعا قاتىستى 20 ناقتى تارماق كورسەتىلگەن. قازىرگى تاڭدا كەلىسىمنىڭ ەكىنشى كەزەڭىنە دايىندىق ءجۇرىپ جاتىر.
سامميتكە ونداعان ەلدىڭ كوشباسشىلارى قاتىستى. ولاردىڭ قاتارىندا فرانتسيا پرەزيدەنتى ەممانۋەل ماكرون، ۇلىبريتانيا پرەمەرى كير ستارمەر، يتاليا پرەمەرى دجوردجا مەلوني، پالەستينا پرەزيدەنتى ماحمۋد ابباس، يوردانيا كورولى ابدۋللا II, ازەربايجان پرەزيدەنتى يلحام اليەۆ جانە ارمەنيا پرەمەرى نيكول پاشينيان بولدى.
ايتا كەتەيىك، يزرايل مەن حاماس وكىلدەرى سامميتكە قاتىسقان جوق. دەگەنمەن ترامپ ەگيپەتكە كەلمەس بۇرىن يزرايل پرەمەرى بينيامين نەتانياحۋمەن كەزدەسىپ، ونى قول قويۋ راسىمىنە شاقىرعان. الايدا ول ەۆرەي مەرەكەسىنىڭ باستالۋىنا بايلانىستى قاتىسا المايتىنىن ايتقان.
