5 қарашада Гонконг соты демократиялық қозғалыс белсендісі Джошуа Вонгты шетелдік күштермен сөз байласты деген айыппен тағы 10 жылға бас бостандығынан айырды. 2024 жылы ол Гонконг тарихындағы ұлттық қауіпсіздікке қатысты ең ірі сот процесі аясында «мемлекеттік билікті құлатуға әрекеттенді» деген айыппен сотталған ондаған белсендінің қатарында болған, деп хабарлайды «Адырна» тілшісі.
Джошуа Вонгтың қылмыстық қудалануы
Джошуа Вонг – Гонконгтегі демократиялық наразылық қозғалысының ең танымал өкілдерінің бірі. Ол түрмеде алты жылға жуық уақыт өткізген. 2024 жылы белсенді «мемлекеттік билікті құлатуға әрекеттенді» деген айыппен 4 жыл 8 айға сотталған. Жазасын өтеп жатқан кезде оған қатысты «шетелдік күштермен сөз байласты» деген жаңа қылмыстық іс қозғалған. 2026 жылдың қыркүйегінде Вонг өз кінәсін мойындаған.
Лондон университетінің SOAS жанындағы Қытай институтының директоры Стив Цанг AFP агенттігіне берген сұхбатында Вонгқа шығарылған жаңа үкім Бейжіңнің «Гонконгті қатаң бақылауда ұстайтынын және 2019 жылға дейін қалада болған неғұрлым либералды ахуалға қайта оралуға мүмкіндік бермейтінін» көрсетуге бағытталғанын айтқан.
Гонконгтегі наразылық шерулері
2019–2020 жылдары Гонконгте автономиялық аймақта Бейжің ықпалының күшеюіне және тұрғындардың азаматтық бостандықтарын шектейтін шешімдердің қабылдануына қарсы жаппай наразылықтар өткен. Шерулердің соңы көшедегі тәртіпсіздіктер мен полициямен қақтығыстарға ұласқан.
Осы наразылықтар аясында 2020 жылдың маусым айының соңында Бүкілқытайлық халық өкілдері жиналысы Тұрақты комитеті Гонконгтің ұлттық қауіпсіздігі туралы заң қабылдаған. Құжатта сепаратистік әрекеттер үшін қылмыстық жауапкершілік қарастырылған.
