5 قاراشادا گونكونگ سوتى دەموكراتيالىق قوزعالىس بەلسەندىسى دجوشۋا ۆونگتى شەتەلدىك كۇشتەرمەن ءسوز بايلاستى دەگەن ايىپپەن تاعى 10 جىلعا باس بوستاندىعىنان ايىردى. 2024 جىلى ول گونكونگ تاريحىنداعى ۇلتتىق قاۋىپسىزدىككە قاتىستى ەڭ ءىرى سوت پروتسەسى اياسىندا «مەملەكەتتىك بيلىكتى قۇلاتۋعا ارەكەتتەندى» دەگەن ايىپپەن سوتتالعان ونداعان بەلسەندىنىڭ قاتارىندا بولعان، دەپ حابارلايدى «ادىرنا» ءتىلشىسى.
دجوشۋا ۆونگتىڭ قىلمىستىق قۋدالانۋى
دجوشۋا ۆونگ – گونكونگتەگى دەموكراتيالىق نارازىلىق قوزعالىسىنىڭ ەڭ تانىمال وكىلدەرىنىڭ ءبىرى. ول تۇرمەدە التى جىلعا جۋىق ۋاقىت وتكىزگەن. 2024 جىلى بەلسەندى «مەملەكەتتىك بيلىكتى قۇلاتۋعا ارەكەتتەندى» دەگەن ايىپپەن 4 جىل 8 ايعا سوتتالعان. جازاسىن وتەپ جاتقان كەزدە وعان قاتىستى «شەتەلدىك كۇشتەرمەن ءسوز بايلاستى» دەگەن جاڭا قىلمىستىق ءىس قوزعالعان. 2026 جىلدىڭ قىركۇيەگىندە ۆونگ ءوز كىناسىن مويىنداعان.
لوندون ۋنيۆەرسيتەتىنىڭ SOAS جانىنداعى قىتاي ينستيتۋتىنىڭ ديرەكتورى ستيۆ تسانگ AFP اگەنتتىگىنە بەرگەن سۇحباتىندا ۆونگقا شىعارىلعان جاڭا ۇكىم بەيجىڭنىڭ «گونكونگتى قاتاڭ باقىلاۋدا ۇستايتىنىن جانە 2019 جىلعا دەيىن قالادا بولعان نەعۇرلىم ليبەرالدى احۋالعا قايتا ورالۋعا مۇمكىندىك بەرمەيتىنىن» كورسەتۋگە باعىتتالعانىن ايتقان.
گونكونگتەگى نارازىلىق شەرۋلەرى
2019–2020 جىلدارى گونكونگتە اۆتونوميالىق ايماقتا بەيجىڭ ىقپالىنىڭ كۇشەيۋىنە جانە تۇرعىنداردىڭ ازاماتتىق بوستاندىقتارىن شەكتەيتىن شەشىمدەردىڭ قابىلدانۋىنا قارسى جاپپاي نارازىلىقتار وتكەن. شەرۋلەردىڭ سوڭى كوشەدەگى تارتىپسىزدىكتەر مەن پوليتسيامەن قاقتىعىستارعا ۇلاسقان.
وسى نارازىلىقتار اياسىندا 2020 جىلدىڭ ماۋسىم ايىنىڭ سوڭىندا بۇكىلقىتايلىق حالىق وكىلدەرى جينالىسى تۇراقتى كوميتەتى گونكونگتىڭ ۇلتتىق قاۋىپسىزدىگى تۋرالى زاڭ قابىلداعان. قۇجاتتا سەپاراتيستىك ارەكەتتەر ءۇشىن قىلمىستىق جاۋاپكەرشىلىك قاراستىرىلعان.
