Қазақстанда жасанды интеллектінің кеңінен енгізілуі төрт миллионға жуық қызметкердің күнделікті жұмыс міндеттеріне әсер етуі мүмкін. Бұл туралы Tengrinews.kz жазды, деп хабарлайды «Адырна» тілшісі.
Еңбек және халықты әлеуметтік қорғау министрлігі Халықаралық еңбек ұйымы мен Польшаның NASK зерттеу институтының әдістемесі негізінде жүргізген талдау нәтижесінде еліміздегі 9,2 миллион адам жұмыс істейтін 1 278 кәсіби топ зерттелген. Бағалау қорытындысына сәйкес, 562 кәсіби топтағы шамамен төрт миллион қызметкердің жұмысы айтарлықтай трансформацияға ұшырауы мүмкін.
Ведомство бұл мамандықтардың толық жойылуы емес, олардың ішіндегі жекелеген міндеттердің автоматтандырылуы туралы екенін атап өтті. Құжаттарды әзірлеу, деректерді өңдеу, ақпарат іздеу және есептердің бастапқы нұсқаларын дайындау сияқты жұмыстарды алгоритмдер орындай алады. Ал шешім қабылдау, нәтижелерді тексеру және жауапкершілік жүктеу міндеттері адам құзырында қалады.
Өзгерістерге көбірек ұшырауы ықтимал мамандықтар қатарында бухгалтерлер, маркетологтар, колл-орталық операторлары, банк және сақтандыру саласының мамандары, деректерді енгізу қызметкерлері мен құжат айналымымен айналысатын қызметкерлер бар.
Сонымен қатар Ғылым және жоғары білім министрлігі QS Quacquarelli Symonds компаниясымен бірлесіп жүргізген зерттеуде Қазақстандағы мамандықтардың 53 пайыздан астамы ішінара автоматтандыруға бейім екені анықталған. Сарапшылардың бағалауынша, жұмыс күшінің шамамен 70 пайызы ЖИ көмегімен еңбек өнімділігін арттыра алады.
Министрлік мәліметінше, 2035 жылға қарай Қазақстанда жасанды интеллект пен цифрлық технологияларға қатысты 33 жаңа мамандық пайда болуы мүмкін. Олардың қатарында ЖИ инженерлері, машиналық оқыту мамандары, ірі тілдік модельдер инженерлері, AI-аудиторлар және AI-агент менеджерлері бар.
Қазірдің өзінде елімізде ЖИ және үлкен деректерге қатысты 32 мамандық Ұлттық кәсіптер классификаторына енгізілген. Алайда бұл бағыттарда нақты жұмыс істейтін мамандар саны әзірге 1 713 адамды ғана құрайды.
ЖИ мамандарының басым бөлігі Алматы мен Астанада шоғырланған. Сала қызметкерлерінің шамамен 70 пайызы осы екі қалада жұмыс істейді. Ал бірқатар өңірлерде мұндай мамандардың саны он адамға да жетпейді.
Білім беру саласында да ЖИ-ді меңгеру қарқынды жүріп жатыр. Ғылым және жоғары білім министрлігінің дерегіне сәйкес, 706 мыңнан астам студент жасанды интеллект бойынша базалық курстардан өткен. Сондай-ақ 104 мыңнан астам адам AI-кәсіпкерлік негіздерін оқыған.
Жасанды интеллект мемлекеттік қызметтер көрсету саласына да енгізіліп жатыр. Еңбек министрлігінің мәліметінше, ЖИ көмегімен атаулы әлеуметтік көмекке қатысты 106 мыңнан астам өтінім өңделген. Сонымен қатар байланыс орталығына түскен өтініштердің 92,6 пайызы автоматты түрде қаралған. Алгоритмдер әлеуметтік қызметтер порталындағы тауарларды модерациялауға және мүгедектікті белгілеу кезінде медициналық құжаттарды талдауға да қатысады.
Алайда мемлекеттік органдар ЖИ енгізудің нақты нәтижелерін бағалайтын бірыңғай жүйенің әлі қалыптаспағанын мойындады. Қазіргі уақытта қызмет көрсету мерзімдерінің қысқаруы, бюджет қаражатының үнемделуі немесе алгоритмдердің қателік деңгейі туралы орталықтандырылған статистика жүргізілмейді.
Сарапшылардың пікірінше, негізгі қауіп мамандықтардың толық жойылуында емес, жұмыс мазмұнының өзгеруінде. Алдағы жылдары еңбек нарығында ақпаратпен жұмыс істей алатын, ЖИ құралдарын тиімді қолданатын және олардың нәтижелерін сараптап, жауапкершілік ала алатын мамандарға сұраныс арта түспек.
