قازاقستاندا جاساندى ينتەللەكتىنىڭ كەڭىنەن ەنگىزىلۋى ءتورت ميلليونعا جۋىق قىزمەتكەردىڭ كۇندەلىكتى جۇمىس مىندەتتەرىنە اسەر ەتۋى مۇمكىن. بۇل تۋرالى Tengrinews.kz جازدى، دەپ حابارلايدى «ادىرنا» ءتىلشىسى.
ەڭبەك جانە حالىقتى الەۋمەتتىك قورعاۋ مينيسترلىگى حالىقارالىق ەڭبەك ۇيىمى مەن پولشانىڭ NASK زەرتتەۋ ينستيتۋتىنىڭ ادىستەمەسى نەگىزىندە جۇرگىزگەن تالداۋ ناتيجەسىندە ەلىمىزدەگى 9,2 ميلليون ادام جۇمىس ىستەيتىن 1 278 كاسىبي توپ زەرتتەلگەن. باعالاۋ قورىتىندىسىنا سايكەس، 562 كاسىبي توپتاعى شامامەن ءتورت ميلليون قىزمەتكەردىڭ جۇمىسى ايتارلىقتاي ترانسفورماتسياعا ۇشىراۋى مۇمكىن.
ۆەدومستۆو بۇل ماماندىقتاردىڭ تولىق جويىلۋى ەمەس، ولاردىڭ ىشىندەگى جەكەلەگەن مىندەتتەردىڭ اۆتوماتتاندىرىلۋى تۋرالى ەكەنىن اتاپ ءوتتى. قۇجاتتاردى ازىرلەۋ، دەرەكتەردى وڭدەۋ، اقپارات ىزدەۋ جانە ەسەپتەردىڭ باستاپقى نۇسقالارىن دايىنداۋ سياقتى جۇمىستاردى الگوريتمدەر ورىنداي الادى. ال شەشىم قابىلداۋ، ناتيجەلەردى تەكسەرۋ جانە جاۋاپكەرشىلىك جۇكتەۋ مىندەتتەرى ادام قۇزىرىندا قالادى.
وزگەرىستەرگە كوبىرەك ۇشىراۋى ىقتيمال ماماندىقتار قاتارىندا بۋحگالتەرلەر، ماركەتولوگتار، كولل-ورتالىق وپەراتورلارى، بانك جانە ساقتاندىرۋ سالاسىنىڭ ماماندارى، دەرەكتەردى ەنگىزۋ قىزمەتكەرلەرى مەن قۇجات اينالىمىمەن اينالىساتىن قىزمەتكەرلەر بار.
سونىمەن قاتار عىلىم جانە جوعارى ءبىلىم مينيسترلىگى QS Quacquarelli Symonds كومپانياسىمەن بىرلەسىپ جۇرگىزگەن زەرتتەۋدە قازاقستانداعى ماماندىقتاردىڭ 53 پايىزدان استامى ءىشىنارا اۆتوماتتاندىرۋعا بەيىم ەكەنى انىقتالعان. ساراپشىلاردىڭ باعالاۋىنشا، جۇمىس كۇشىنىڭ شامامەن 70 پايىزى جي كومەگىمەن ەڭبەك ونىمدىلىگىن ارتتىرا الادى.
مينيسترلىك مالىمەتىنشە، 2035 جىلعا قاراي قازاقستاندا جاساندى ينتەللەكت پەن تسيفرلىق تەحنولوگيالارعا قاتىستى 33 جاڭا ماماندىق پايدا بولۋى مۇمكىن. ولاردىڭ قاتارىندا جي ينجەنەرلەرى، ماشينالىق وقىتۋ ماماندارى، ءىرى تىلدىك مودەلدەر ينجەنەرلەرى، AI-اۋديتورلار جانە AI-اگەنت مەنەدجەرلەرى بار.
قازىردىڭ وزىندە ەلىمىزدە جي جانە ۇلكەن دەرەكتەرگە قاتىستى 32 ماماندىق ۇلتتىق كاسىپتەر كلاسسيفيكاتورىنا ەنگىزىلگەن. الايدا بۇل باعىتتاردا ناقتى جۇمىس ىستەيتىن ماماندار سانى ازىرگە 1 713 ادامدى عانا قۇرايدى.
جي ماماندارىنىڭ باسىم بولىگى الماتى مەن استانادا شوعىرلانعان. سالا قىزمەتكەرلەرىنىڭ شامامەن 70 پايىزى وسى ەكى قالادا جۇمىس ىستەيدى. ال بىرقاتار وڭىرلەردە مۇنداي مامانداردىڭ سانى ون ادامعا دا جەتپەيدى.
ءبىلىم بەرۋ سالاسىندا دا جي-ءدى مەڭگەرۋ قارقىندى ءجۇرىپ جاتىر. عىلىم جانە جوعارى ءبىلىم مينيسترلىگىنىڭ دەرەگىنە سايكەس، 706 مىڭنان استام ستۋدەنت جاساندى ينتەللەكت بويىنشا بازالىق كۋرستاردان وتكەن. سونداي-اق 104 مىڭنان استام ادام AI-كاسىپكەرلىك نەگىزدەرىن وقىعان.
جاساندى ينتەللەكت مەملەكەتتىك قىزمەتتەر كورسەتۋ سالاسىنا دا ەنگىزىلىپ جاتىر. ەڭبەك مينيسترلىگىنىڭ مالىمەتىنشە، جي كومەگىمەن اتاۋلى الەۋمەتتىك كومەككە قاتىستى 106 مىڭنان استام ءوتىنىم وڭدەلگەن. سونىمەن قاتار بايلانىس ورتالىعىنا تۇسكەن وتىنىشتەردىڭ 92,6 پايىزى اۆتوماتتى تۇردە قارالعان. الگوريتمدەر الەۋمەتتىك قىزمەتتەر پورتالىنداعى تاۋارلاردى مودەراتسيالاۋعا جانە مۇگەدەكتىكتى بەلگىلەۋ كەزىندە مەديتسينالىق قۇجاتتاردى تالداۋعا دا قاتىسادى.
الايدا مەملەكەتتىك ورگاندار جي ەنگىزۋدىڭ ناقتى ناتيجەلەرىن باعالايتىن بىرىڭعاي جۇيەنىڭ ءالى قالىپتاسپاعانىن مويىندادى. قازىرگى ۋاقىتتا قىزمەت كورسەتۋ مەرزىمدەرىنىڭ قىسقارۋى، بيۋدجەت قاراجاتىنىڭ ۇنەمدەلۋى نەمەسە الگوريتمدەردىڭ قاتەلىك دەڭگەيى تۋرالى ورتالىقتاندىرىلعان ستاتيستيكا جۇرگىزىلمەيدى.
ساراپشىلاردىڭ پىكىرىنشە، نەگىزگى قاۋىپ ماماندىقتاردىڭ تولىق جويىلۋىندا ەمەس، جۇمىس مازمۇنىنىڭ وزگەرۋىندە. الداعى جىلدارى ەڭبەك نارىعىندا اقپاراتپەن جۇمىس ىستەي الاتىن، جي قۇرالدارىن ءتيىمدى قولداناتىن جانە ولاردىڭ ناتيجەلەرىن ساراپتاپ، جاۋاپكەرشىلىك الا الاتىن ماماندارعا سۇرانىس ارتا تۇسپەك.
