Qazaqstanda jasandy intellektınıŋ keŋınen engızıluı tört millionǧa juyq qyzmetkerdıŋ kündelıktı jūmys mındetterıne äser etuı mümkın. Būl turaly Tengrinews.kz jazdy, dep habarlaidy «Adyrna» tılşısı.
Eŋbek jäne halyqty äleumettık qorǧau ministrlıgı Halyqaralyq eŋbek ūiymy men Polşanyŋ NASK zertteu institutynyŋ ädıstemesı negızınde jürgızgen taldau nätijesınde elımızdegı 9,2 million adam jūmys ısteitın 1 278 käsıbi top zerttelgen. Baǧalau qorytyndysyna säikes, 562 käsıbi toptaǧy şamamen tört million qyzmetkerdıŋ jūmysy aitarlyqtai transformasiiaǧa ūşyrauy mümkın.
Vedomstvo būl mamandyqtardyŋ tolyq joiyluy emes, olardyŋ ışındegı jekelegen mındetterdıŋ avtomattandyryluy turaly ekenın atap öttı. Qūjattardy äzırleu, derekterdı öŋdeu, aqparat ızdeu jäne esepterdıŋ bastapqy nūsqalaryn daiyndau siiaqty jūmystardy algoritmder oryndai alady. Al şeşım qabyldau, nätijelerdı tekseru jäne jauapkerşılık jükteu mındetterı adam qūzyrynda qalady.
Özgerısterge köbırek ūşyrauy yqtimal mamandyqtar qatarynda buhgalterler, marketologtar, koll-ortalyq operatorlary, bank jäne saqtandyru salasynyŋ mamandary, derekterdı engızu qyzmetkerlerı men qūjat ainalymymen ainalysatyn qyzmetkerler bar.
Sonymen qatar Ǧylym jäne joǧary bılım ministrlıgı QS Quacquarelli Symonds kompaniiasymen bırlesıp jürgızgen zertteude Qazaqstandaǧy mamandyqtardyŋ 53 paiyzdan astamy ışınara avtomattandyruǧa beiım ekenı anyqtalǧan. Sarapşylardyŋ baǧalauynşa, jūmys küşınıŋ şamamen 70 paiyzy Jİ kömegımen eŋbek önımdılıgın arttyra alady.
Ministrlık mälımetınşe, 2035 jylǧa qarai Qazaqstanda jasandy intellekt pen sifrlyq tehnologiialarǧa qatysty 33 jaŋa mamandyq paida boluy mümkın. Olardyŋ qatarynda Jİ injenerlerı, maşinalyq oqytu mamandary, ırı tıldık modelder injenerlerı, AI-auditorlar jäne AI-agent menedjerlerı bar.
Qazırdıŋ özınde elımızde Jİ jäne ülken derekterge qatysty 32 mamandyq Ūlttyq käsıpter klassifikatoryna engızılgen. Alaida būl baǧyttarda naqty jūmys ısteitın mamandar sany äzırge 1 713 adamdy ǧana qūraidy.
Jİ mamandarynyŋ basym bölıgı Almaty men Astanada şoǧyrlanǧan. Sala qyzmetkerlerınıŋ şamamen 70 paiyzy osy ekı qalada jūmys ısteidı. Al bırqatar öŋırlerde mūndai mamandardyŋ sany on adamǧa da jetpeidı.
Bılım beru salasynda da Jİ-dı meŋgeru qarqyndy jürıp jatyr. Ǧylym jäne joǧary bılım ministrlıgınıŋ deregıne säikes, 706 myŋnan astam student jasandy intellekt boiynşa bazalyq kurstardan ötken. Sondai-aq 104 myŋnan astam adam AI-käsıpkerlık negızderın oqyǧan.
Jasandy intellekt memlekettık qyzmetter körsetu salasyna da engızılıp jatyr. Eŋbek ministrlıgınıŋ mälımetınşe, Jİ kömegımen atauly äleumettık kömekke qatysty 106 myŋnan astam ötınım öŋdelgen. Sonymen qatar bailanys ortalyǧyna tüsken ötınışterdıŋ 92,6 paiyzy avtomatty türde qaralǧan. Algoritmder äleumettık qyzmetter portalyndaǧy tauarlardy moderasiialauǧa jäne mügedektıktı belgıleu kezınde medisinalyq qūjattardy taldauǧa da qatysady.
Alaida memlekettık organdar Jİ engızudıŋ naqty nätijelerın baǧalaityn bıryŋǧai jüienıŋ älı qalyptaspaǧanyn moiyndady. Qazırgı uaqytta qyzmet körsetu merzımderınıŋ qysqaruy, biudjet qarajatynyŋ ünemdeluı nemese algoritmderdıŋ qatelık deŋgeiı turaly ortalyqtandyrylǧan statistika jürgızılmeidı.
Sarapşylardyŋ pıkırınşe, negızgı qauıp mamandyqtardyŋ tolyq joiyluynda emes, jūmys mazmūnynyŋ özgeruınde. Aldaǧy jyldary eŋbek naryǧynda aqparatpen jūmys ıstei alatyn, Jİ qūraldaryn tiımdı qoldanatyn jäne olardyŋ nätijelerın saraptap, jauapkerşılık ala alatyn mamandarǧa sūranys arta tüspek.
