2025 жылы Өзбекстанда күн және жел электр станцияларында өндірілген электр энергиясының көлемі 10 миллиард кВт·сағатқа жетті, деп хабарлайды "Адырна" ұлттық порталы Ферғанаға сілтеп.
Бұл көрсеткіш 8 желтоқсандағы ресми деректер бойынша рекордтық деңгейге жеткені хабарланды. Елдің энергетика министрлігінің дерегінше, жалпы қуаты 5,5 мың мегаваттан асатын күн және жел электр станциялары жұмыс істейді. Биылдан бастап барлық «жасыл» энергетикалық нысандар, соның ішінде гидроэлектростанциялар, жалпы 16 миллиард кВт·сағат электр энергиясын өндірді. Бұл көрсеткіш 6,6 миллион тұрмыстық тұтынушының жылдық электр энергиясына тең.
Энергетика министрлігінің басшылары атап өткендей, «жасыл» энергия өндірісінің артуы 2,7 миллиард текше метр табиғи газды үнемдеуге және атмосфераға 4,4 миллион тонна зиянды газ шығарындыларын азайтуға мүмкіндік берді.
Министрлік «жасыл» энергияны дамыту елдің энергетикалық саясатындағы негізгі мақсаттарға сәйкес жүзеге асырылып жатқанын ескертті. 5 желтоқсанда өткен «Тұрақты энергетика – Жаңа Өзбекстанның болашағына сенімді қадам» конференциясында президент Шавкат Мирзиёев экологиялық таза және жаңартылатын энергия көздерін пайдаланып, халықты энергия ресурстарымен қамтамасыз етуді негізгі міндеттердің бірі деп атап өткен.
Айта кетейік, 22 қазаннан бері елдегі күн және жел станциялары тек бір жарым ай ішінде 1 миллиард кВт·сағат қосымша электр энергиясын өндірді, яғни 9 миллиардтан 10 миллиард кВт·сағатқа жетті.
