2026 жылғы 30 мамырда Иранның тақ мұрагері Реза Пехлеви Украинадағы Одесса қаласына келіп, Қара теңіз қауіпсіздік форумына қатысты. Сол сапар барысында ол Украина президенті Владимир Зеленскиймен кездесу өткізді. Сапар туралы ақпаратты Украина Жоғарғы Радасының депутаты Алексей Гончаренко хабарлап, ирандық оппозиция өкілін өзі қарсы алған, деп хабарлайды “Адырна”.
Қара теңіз қауіпсіздік форумы — Одессада жыл сайын ұйымдастырылатын халықаралық алаң. Ол өңірлік және жаһандық қауіпсіздік мәселелерін талқылауға арналған.
Биылғы форум 29 мамырда басталып, Украина, Еуропа елдері, АҚШ және басқа да мемлекеттерден келген 1200-ден астам қатысушыны жинады. Олардың қатарында саясаткерлер, дипломаттар, әскери сарапшылар, журналистер мен халықаралық ұйым өкілдері бар.
Форумға қатысушылардың арасында АҚШ сенаторлары Ричард Блюменталь мен Марк Келли, конгрессмен Джим Хаймс және Украинадағы АҚШ-тың уақытша сенімді өкілі Джули Дэвис те болды.
Форум аясында Қара теңіз аймағындағы қауіпсіздік, Ресей–Украина соғысы, энергетикалық тұрақтылық және жаһандық геосаяси өзгерістер талқыланды. Сондай-ақ Таяу Шығыс елдерінің өңірлік саясаттағы рөліне де ерекше назар аударылды.
Украина мен аймақтық телеграм-арналардың мәліметінше, Владимир Зеленский мен Реза Пехлеви арасындағы кездесуде Ирандағы қазіргі жағдай және халықаралық қауіпсіздік мәселелері сөз болған. Сонымен қатар Иран халқына қолдау көрсету және Тегеран мен Мәскеу арасындағы әскери-саяси ынтымақтастыққа байланысты ықтимал қауіптер талқыланған.
Реза Пехлеви — эмиграцияда тұратын, Ирандағы оппозициялық қозғалыстың символдық тұлғаларының бірі. Ол соңғы жылдары Иранда демократиялық өзгерістерді қолдап, халықаралық деңгейде белсенді саяси ұстанымымен танылып келеді.
Оның Одесса форумына қатысуы Украина тарапынан ирандық оппозиция өкілдерімен байланыстарды кеңейту әрекеті ретінде бағалануда. Сарапшылар мұны Киевтің Мәскеумен одақтас елдер мен күштерге ықпал етуге бағытталған дипломатиялық стратегиясының бір бөлігі деп қарастырады.
Одессадағы бұл кездесу Украина билігінің ирандық оппозиция өкілдерімен сирек ашық форматтағы байланыстарының бірі болды. Сарапшылардың пікірінше, мұндай дипломатиялық қадамдар аймақтағы геосаяси бәсекелестіктің жаңа кезеңін көрсетеді.
