Қазақстанның денсаулық сақтау министрлігі әлеуметтік желілерде тараған ақпараттан кейін Алматыдағы «Аяжан» жеке клиникасына жоспардан тыс тексеру жүргізуді бастамақ, деп хабарлайды "Адырна" ұлттық порталы ҚазТАГ-қа сілтеп.
Ведомство медициналық анықтамалар мен жеке медициналық кітапшаларды заңсыз беру деректерін тексереді.
Министрліктің баспасөз қызметінің мәліметінше, егер тексеру барысында заңбұзушылықтар расталса, уәкілетті органдар өз құзыреті шегінде тиісті шаралар қабылдайды.
Ведомство Қазақстан Республикасы Қылмыстық кодексінің 385-бабына сәйкес, жалған ресми құжаттарды қолдан жасау, дайындау немесе өткізу, сондай-ақ олардың жалған екенін біле тұра пайдалану қылмыстық жауапкершілікке әкелетінін еске салды.
Министрлік медициналық құжаттар тек нақты жүргізілген тексерулер мен медициналық қарап-тексеру нәтижелері бойынша белгіленген талаптарға сай берілуі керектігін атап өтті. Заңсыз анықтама рәсімдегендермен қатар, жалған құжатты әдейі сатып алған немесе пайдаланған азаматтар да жауапқа тартылуы мүмкін.
Осыған байланысты ведомство азаматтарды медициналық негізсіз анықтама немесе еңбекке уақытша жарамсыздық парағын алуға келіспеуге, клиникалардың заңды қызметін тексеруге және заңбұзушылықтар туралы құзырлы органдарға хабарлауға шақырды.
Министрлік медициналық құжаттарды рәсімдеу үдерісінің ашықтығын арттыру және деректерді бақылауды күшейту үшін цифрлық құралдар енгізіліп жатқанын хабарлады.
Ведомствоның мәліметінше, 2026 жылдың басынан бері министрліктің ақпараттық жүйелері арқылы 13,7 миллионнан астам электрондық медициналық құжат берілген. Оның ішінде уақытша еңбекке жарамсыздық парақтары мен медициналық анықтамалар, сондай-ақ диспансерлік есепте тұруға қатысты құжаттар бар.
Аурухана парағын ашу немесе ұзарту туралы ақпарат жұмыс берушілерге hr.enbek.kz порталы арқылы қызметкердің келісімімен ғана жолданады. Ал азаматтар өздерінің еңбекке уақытша жарамсыздық парағына қатысты мәліметтерді Enbek HR мобильді қосымшасынан көре алады.
Министрлік электрондық медициналық құжаттар медициналық тексерулерден өту, уақытша еңбекке жарамсыздықты рәсімдеу, мүгедектікті белгілеу, жұмысқа орналасу және басқа да медициналық-әкімшілік рәсімдер кезінде қолданылатынын атап өтті.
