Экс-министр Қуандық Бишімбаевтың әйелі Салтанат Нүкенова өлтірілген Астанадағы «Гастро-орталық» директоры да қамауға алынды, деп хабарлайды “Адырна” ұлттық порталы.
Полиция департаментінің баспасөз қызметі бұрынғы министр Қуандық Бишімбаевтың әйелін өлтіру фактісін жасырды деген күдікпен кісі өлімі орын алған “Гастро-орталық” мейрамхана кешенінің директоры ұсталғанын хабарлады.
Тергеуді Астана қалалық полиция департаментінің тергеу басқармасы жүргізіп жатыр.
«Қалалық полиция департаменті елорда мейрамханаларының бірінде ҚР ҚК 99-бабы (Кісі өлтіру) бойынша әйелді өлтіру ісіне қатысты тергеуді жалғастыруда. Қылмыс жасады деген күдікті Астана қаласының тергеу сотымен қамауға алынды. Қазіргі уақытта тергеу органдары оқиғаның барлық мән-жайларын және нақты адамдардың кінәсін анықтауға бағытталған қажетті іс-шаралардың барлық кешенін орындауда. ҚР Қылмыстық Кодексінің 432-бабына сәйкес, қылмысты жасырғаны үшін «Гастро-орталық» директоры тергеу изоляторына қамалды. Тағы да Қылмыстық Кодекстің 434-бабы бойынша қылмыстың болып жатқаны туралы ақпарат бермегені үшін және 119-бабының 3-тармағына сәйкес, зардап шегушіні қауіпті жағдайда қалдырғаны үшін қылмыстық іс қозғалды. Іс Астана қаласы Полиция департаменті Тергеу басқармасының және Ішкі істер министрлігінің бақылауында болады», - деп толықтырды полицейлер.
Related news
