Бөкетов университетіне жаңа мәртебе берілді

Қарағандыдағы Бөкетов университетіне зерттеу университеті мәртебесі берілді, деп хабарлайды "Адырна" тілшісі. Қазақстан Республикасы Үкіметінің 2024 жылғы 5 сәуірдегі №258 қаулысына сәйкес Е.А. Бөкетов атындағы Қарағанды университетіне зерттеу университеті мәртебесі берілген. QS Asia рейтингінде университет халықаралық деңгейде өзінің бәсекеге қабілеттілігін көрсете отырып, 206-шы орында тұр. Ал ЖОО ұжымы 2000-ға жуық жоғары білікті оқытушылардан құралып, олардың арасында атақты ғалымдар, Ұлттық Ғылым академиясының корреспондент-мүшелері және беделді ғылыми стипендиялардың лауреаттары, «Жоғары оқу орнының үздік оқытушысы» және «Үздік ғылыми қызметкер» атақтарының иегерлері бар. Профессор-оқытушылар құрамы - ғылыми ойдың дамуына және болашақ мамандарды даярлауға құнды үлес қосатын талантты адамдар. Университеттің ғылыми инфрақұрылымында 13 факультет, 20 ғылыми-зерттеу институты, ғылыми орталықтар мен ғылыми зертханалар жұмыс істейді. Бүгінде жоғары оқу орнында жалпы сомасы 2 миллиард теңгеге жуық 112 ғылыми жоба іске асырылуда.