Батыс Қазақстан облысында бір отбасындағы бес баланың өмірін қиған өртке қатысты алғашқы болжам айтылды, деп хабарлайды "Адырна" ұлттық порталы.
Бұл туралы Төтенше жағдайлар вице-министрі Кеген Тұрсынбаев Сенат кулуарында мәлім етті.
Вице-министрдің айтуынша, қайғылы оқиға кезінде балалардың әкесі жұмыста болған, ал анасы дүкенге кетіп, балаларды үйге сыртынан жауып кеткен. Алдын ала болжам бойынша, өрт балалардың ойынынан шыққан.
"Алдын ала себеп – балалардың ойыны. Қазір сараптама жұмыстары аяқталуға жақын.
Тергеу жалғасып жатыр", – деді Кеген Тұрсынбаев.
Сондай-ақ ол отбасының қазан айына дейін газбен жабдықталған бұрынғы үйде тұрғанын, алайда бір ай бұрын басқа үйге көшкенін айтты.
Еске салайық, 4 мамырда Сырым ауданына қарасты Жымпиты ауылындағы жеке тұрғын үйден өрт шығып, 1 жастан 6 жасқа дейінгі бес бала көз жұмған болатын. Қайғылы жағдайдан кейін облыстық полиция департаменті қылмыстық іс қозғады.
