Қазақстан мен Қытай арасындағы сауда айналымына қатысты статистикалық айырмашылықтар бірнеше жыл бойы сақталып келеді, деп хабарлайды "Адырна" ұлттық порталы LS-ке сілтеп
2025 жылы бұл айырма бұрынғыдан да артқан.
Статистикаға сәйкес, 2021 жылы екі елдің сауда көрсеткіштері арасындағы айырма шамамен 40% болса, 2025 жылы ол 43%-ға жетті.
Қытай кеденінің мәліметтері бойынша 2025 жылы Қазақстанмен сауда айналымы $48,7 млрд болды, ал ҚР Мемлекеттік кірістер комитеті – $34,1 млрд деген дерек ұсынады. Айырмашылық $14,6 млрд құрайды.
Қазақстанның Қытайдан импортында ең ірі айырмашылықтар байқалады.
2025 жылы Қытай деректері бойынша импорт $29,7 млрд болса, Қазақстан кеденінде бұл көрсеткіш $18,9 млрд деп тіркелген. Бұл шамамен 57% айырма, ал абсолюттік мәні – $10,8 млрд.
Қазақстанның Қытайға экспортында айырмашылықтар салыстырмалы түрде аз. 2025 жылы Қытай кеденінің дерегі бойынша Қазақстаннан импортталған тауарлар $19 млрд болса, Қазақстанның есебі бойынша – $15,2 млрд. Айырмашылық 25%, немесе $3,8 млрд құрады.
Мамандар сауда деректеріндегі айырмашылықтардың негізгі себебі ретінде әр елдің кеден статистикасының есептеу әдістемесінің әртүрлілігін атап көрсетеді. Импортқа қатысты айырма экспортқа қарағанда едәуір жоғары.
