قازاقستان مەن قىتاي اراسىنداعى ساۋدا اينالىمىنا قاتىستى ستاتيستيكالىق ايىرماشىلىقتار بىرنەشە جىل بويى ساقتالىپ كەلەدى، دەپ حابارلايدى "ادىرنا" ۇلتتىق پورتالى LS-كە سىلتەپ
2025 جىلى بۇل ايىرما بۇرىنعىدان دا ارتقان.
ستاتيستيكاعا سايكەس، 2021 جىلى ەكى ەلدىڭ ساۋدا كورسەتكىشتەرى اراسىنداعى ايىرما شامامەن 40% بولسا، 2025 جىلى ول 43%-عا جەتتى.
قىتاي كەدەنىنىڭ مالىمەتتەرى بويىنشا 2025 جىلى قازاقستانمەن ساۋدا اينالىمى $48,7 ملرد بولدى، ال قر مەملەكەتتىك كىرىستەر كوميتەتى – $34,1 ملرد دەگەن دەرەك ۇسىنادى. ايىرماشىلىق $14,6 ملرد قۇرايدى.
قازاقستاننىڭ قىتايدان يمپورتىندا ەڭ ءىرى ايىرماشىلىقتار بايقالادى.
2025 جىلى قىتاي دەرەكتەرى بويىنشا يمپورت $29,7 ملرد بولسا، قازاقستان كەدەنىندە بۇل كورسەتكىش $18,9 ملرد دەپ تىركەلگەن. بۇل شامامەن 57% ايىرما، ال ابسوليۋتتىك ءمانى – $10,8 ملرد.
قازاقستاننىڭ قىتايعا ەكسپورتىندا ايىرماشىلىقتار سالىستىرمالى تۇردە از. 2025 جىلى قىتاي كەدەنىنىڭ دەرەگى بويىنشا قازاقستاننان يمپورتتالعان تاۋارلار $19 ملرد بولسا، قازاقستاننىڭ ەسەبى بويىنشا – $15,2 ملرد. ايىرماشىلىق 25%، نەمەسە $3,8 ملرد قۇرادى.
ماماندار ساۋدا دەرەكتەرىندەگى ايىرماشىلىقتاردىڭ نەگىزگى سەبەبى رەتىندە ءار ەلدىڭ كەدەن ستاتيستيكاسىنىڭ ەسەپتەۋ ادىستەمەسىنىڭ ارتۇرلىلىگىن اتاپ كورسەتەدى. يمپورتقا قاتىستى ايىرما ەكسپورتقا قاراعاندا ەداۋىر جوعارى.
