Жошы хан кесенесі мен Домбауылға апаратын жол құрылысына шамамен 5,7 млрд теңге жұмсалмақ, деп хабарлайды "Адырна" ұлттық порталы.
«Тапсырыс беруші – «Қарағанды облысының жолаушылар көлігі және автомобиль жолдары басқармасы» мемлекеттік мекемесі; атауы - автомобиль жолдарын салу бойынша жұмыстар; қосымша сипаттама – "Сәтбаев-Малшыбай-Жошыхан кесенесі, Домбауыл" автомобиль жолын салу, жоспарланған сома – 5 688 998 668 теңге», - делінген Мемлекеттік сатып алу порталында жарияланған лоттың сипаттамасында.Конкурсқа қатысуға өтінімдерді алдын ала қабылдау қаңтардың 4-і мен 21-і аралығында жүргізіледі.
"Сәтбаев-Малшыбай-Жошыхан кесенесі, Домбауыл" автомобиль жолын салудың негізгі мақсаты - Жошыхан және Домбауыл кесенелер маңын абаттандыруды қамтамасыз ету болып табылады", - делінген техникалық сипаттамада.Жошы хан кесенесі Жезқазған қаласынан 50 шақырым жерде орналасқан. Жошы - Моңғол империясының батысындағы жерлерді мұра еткен Шыңғыс ханның үлкен ұлы, Алтын Орданың негізін қалаушы. Домбауыл кесенесі – Жезқазған қаласынан солтүстік-шығысқа қарай 50 шақырым жерде, Қаракеңгір өзенінің сол жағасында орналасқан. Аңыз бойынша бұл кесене ұлы сазгер және жауынгер Домбауыл құрметіне салынған екен, ал өзінің болғаны тарих пен мифпен (ертегі-аңызбен) ұштасады.
"Адырна" ұлттық порталы
