جوشى حان كەسەنەسى مەن دومباۋىلعا اپاراتىن جول قۇرىلىسىنا شامامەن 5,7 ملرد تەڭگە جۇمسالماق، دەپ حابارلايدى "ادىرنا" ۇلتتىق پورتالى.
«تاپسىرىس بەرۋشى – «قاراعاندى وبلىسىنىڭ جولاۋشىلار كولىگى جانە اۆتوموبيل جولدارى باسقارماسى» مەملەكەتتىك مەكەمەسى; اتاۋى - اۆتوموبيل جولدارىن سالۋ بويىنشا جۇمىستار; قوسىمشا سيپاتتاما – "ساتباەۆ-مالشىباي-جوشىحان كەسەنەسى، دومباۋىل" اۆتوموبيل جولىن سالۋ، جوسپارلانعان سوما – 5 688 998 668 تەڭگە»، - دەلىنگەن مەملەكەتتىك ساتىپ الۋ پورتالىندا جاريالانعان لوتتىڭ سيپاتتاماسىندا.
كونكۋرسقا قاتىسۋعا وتىنىمدەردى الدىن الا قابىلداۋ قاڭتاردىڭ 4-ءى مەن 21-ءى ارالىعىندا جۇرگىزىلەدى.
"ساتباەۆ-مالشىباي-جوشىحان كەسەنەسى، دومباۋىل" اۆتوموبيل جولىن سالۋدىڭ نەگىزگى ماقساتى - جوشىحان جانە دومباۋىل كەسەنەلەر ماڭىن اباتتاندىرۋدى قامتاماسىز ەتۋ بولىپ تابىلادى", - دەلىنگەن تەحنيكالىق سيپاتتامادا.
جوشى حان كەسەنەسى جەزقازعان قالاسىنان 50 شاقىرىم جەردە ورنالاسقان. جوشى - موڭعول يمپەرياسىنىڭ باتىسىنداعى جەرلەردى مۇرا ەتكەن شىڭعىس حاننىڭ ۇلكەن ۇلى، التىن وردانىڭ نەگىزىن قالاۋشى.
دومباۋىل كەسەنەسى – جەزقازعان قالاسىنان سولتۇستىك-شىعىسقا قاراي 50 شاقىرىم جەردە، قاراكەڭگىر وزەنىنىڭ سول جاعاسىندا ورنالاسقان. اڭىز بويىنشا بۇل كەسەنە ۇلى سازگەر جانە جاۋىنگەر دومباۋىل قۇرمەتىنە سالىنعان ەكەن، ال ءوزىنىڭ بولعانى تاريح پەن ميفپەن (ەرتەگى-اڭىزبەن) ۇشتاسادى.
"ادىرنا" ۇلتتىق پورتالى