شىعىس قازاقستان وبلىسىنىڭ پوليتسيا قىزمەتكەرلەرى تۇرعىندارعا وڭ ءرولدى اۆتوكولىكتەردى تاكسي رەتىندە پايدالانباۋعا ۇندەدى، دەپ حابارلايدى "ادىرنا" ۇلتتىق پورتالى.
بۇل تۋرالى وبلىستىق پوليتسيا دەپارتامەنتى حابارلادى.
ۆەدومستۆو مالىمەتىنشە، جول-كولىك وقيعالارىنىڭ باسىم بولىگى ءدال وسىنداي كولىكتەردىڭ قاتىسۋىمەن تىركەلگەن. وڭ ءرولدى اۆتوكولىكتەردى جولاۋشى تاسىمالداۋدا قولدانۋعا تىيىم سالىنعانىنا قاراماستان، كەيبىر زاڭسىز تاسىمالداۋشىلار بۇل تالاپتى ەلەمەي، ءوز قىزمەتىن جالعاستىرىپ كەلەدى.
پوليتسيا وكىلدەرى مۇنداي كولىكتەردى جۇرگىزۋ بارىسىندا كورىنۋ ايماعىنىڭ شەكتەۋلى بولۋى جولداعى قاۋىپتى جاعدايلاردىڭ تۋىنداۋىنا اسەر ەتەتىنىن اتاپ ءوتتى.
"جولاۋشى تاسىمالى كەزىندە كەز كەلگەن قاتەلىكتىڭ سالدارى اۋىر بولۋى مۇمكىن. سوندىقتان تۇرعىنداردى تەك قاۋىپسىز كولىك قىزمەتىن پايدالانۋعا شاقىرامىز", — دەلىنگەن حابارلامادا.
