Фото: russian.anf-news
Сирияда жанармай бағасының 25–40 пайызға қымбаттауына байланысты наразылық акциялары өтіп, тұрғындар халықаралық M5 автожолын жауып тастады. Бұл туралы Syria TV жариялады, деп хабарлайды “Адырна”.
Дүйсенбіге қараған түні Идлиб провинциясындағы Маарет-эн-Нууман қаласы маңында наразылық білдірушілер жолды жанып жатқан дөңгелектер мен қоқыс арқылы бөгеген. Бұл автожол Сирияның солтүстік және оңтүстік аймақтарын байланыстырады.
Бұған дейін наразылық білдірушілер Дейр-эз-Зор – Ракка тасжолын да жапқаны хабарланған. Соның салдарынан жанармай тасымалдайтын көліктер керуенінің қозғалысы тоқтатылды. Сонымен қатар Алеппо провинциясының солтүстігіндегі Мареа және Эль-Баб қалаларының тұрғындары да наразылық акциясына шықты.
12 қыркүйекте Энергетика министрлігі жанындағы арнайы комитет әлемдік нарықтағы бағаның күрт өсуі және елдің мұнай өнімдерін импортқа тәуелділігін арттырған Банияс мұнай өңдеу зауытындағы күрделі жөндеу жұмыстарына байланысты бензин, дизель отыны және басқа да мұнай өнімдерінің бағасын уақытша 25–40 пайызға көтеретінін мәлімдеді.
13 қыркүйектен бастап жанармай бағасы 25–40 пайызға қымбаттады. Атап айтқанда, АИ-95 бензинінің бағасы 1,2 доллардан 1,6 долларға, ал дизель отыны 1 доллардан 1,43 долларға өсті. Жергілікті сарапшылардың болжамынша, бұл жағдай көлік қызметтерінің құнын 20–30 пайызға арттыруы мүмкін.
Энергетика министрлігі бағаны түзету мұнай өнімдерін сатып алу құны мен олардың ішкі нарықтағы сату бағасы арасындағы айырмашылықты азайтуға бағытталғанын мәлімдеді. Ведомствоның айтуынша, бұл Сирияның мұнай компаниясына алдағы жеткізілімдерді қаржыландырып, ішкі нарықты жанармаймен қамтамасыз етуді жалғастыруға мүмкіндік береді.
Министрлік бағаның көтерілуі уақытша шара екенін атап өтті. Нарықтағы жағдай өзгерген сайын жанармай бағасы қайта қаралатыны айтылды.
