فوتو: russian.anf-news
سيريادا جانارماي باعاسىنىڭ 25–40 پايىزعا قىمباتتاۋىنا بايلانىستى نارازىلىق اكتسيالارى ءوتىپ، تۇرعىندار حالىقارالىق M5 اۆتوجولىن جاۋىپ تاستادى. بۇل تۋرالى Syria TV جاريالادى، دەپ حابارلايدى “ادىرنا”.
دۇيسەنبىگە قاراعان ءتۇنى يدليب پروۆينتسياسىنداعى ماارەت-ەن-نۋمان قالاسى ماڭىندا نارازىلىق بىلدىرۋشىلەر جولدى جانىپ جاتقان دوڭگەلەكتەر مەن قوقىس ارقىلى بوگەگەن. بۇل اۆتوجول سيريانىڭ سولتۇستىك جانە وڭتۇستىك ايماقتارىن بايلانىستىرادى.
بۇعان دەيىن نارازىلىق بىلدىرۋشىلەر دەير-ەز-زور – راككا تاسجولىن دا جاپقانى حابارلانعان. سونىڭ سالدارىنان جانارماي تاسىمالدايتىن كولىكتەر كەرۋەنىنىڭ قوزعالىسى توقتاتىلدى. سونىمەن قاتار الەپپو پروۆينتسياسىنىڭ سولتۇستىگىندەگى مارەا جانە ەل-باب قالالارىنىڭ تۇرعىندارى دا نارازىلىق اكتسياسىنا شىقتى.
12 قىركۇيەكتە ەنەرگەتيكا مينيسترلىگى جانىنداعى ارنايى كوميتەت الەمدىك نارىقتاعى باعانىڭ كۇرت ءوسۋى جانە ەلدىڭ مۇناي ونىمدەرىن يمپورتقا تاۋەلدىلىگىن ارتتىرعان بانياس مۇناي وڭدەۋ زاۋىتىنداعى كۇردەلى جوندەۋ جۇمىستارىنا بايلانىستى بەنزين، ديزەل وتىنى جانە باسقا دا مۇناي ونىمدەرىنىڭ باعاسىن ۋاقىتشا 25–40 پايىزعا كوتەرەتىنىن مالىمدەدى.
13 قىركۇيەكتەن باستاپ جانارماي باعاسى 25–40 پايىزعا قىمباتتادى. اتاپ ايتقاندا، اي-95 بەنزينىنىڭ باعاسى 1,2 دوللاردان 1,6 دوللارعا، ال ديزەل وتىنى 1 دوللاردان 1,43 دوللارعا ءوستى. جەرگىلىكتى ساراپشىلاردىڭ بولجامىنشا، بۇل جاعداي كولىك قىزمەتتەرىنىڭ قۇنىن 20–30 پايىزعا ارتتىرۋى مۇمكىن.
ەنەرگەتيكا مينيسترلىگى باعانى تۇزەتۋ مۇناي ونىمدەرىن ساتىپ الۋ قۇنى مەن ولاردىڭ ىشكى نارىقتاعى ساتۋ باعاسى اراسىنداعى ايىرماشىلىقتى ازايتۋعا باعىتتالعانىن مالىمدەدى. ۆەدومستۆونىڭ ايتۋىنشا، بۇل سيريانىڭ مۇناي كومپانياسىنا الداعى جەتكىزىلىمدەردى قارجىلاندىرىپ، ىشكى نارىقتى جانارمايمەن قامتاماسىز ەتۋدى جالعاستىرۋعا مۇمكىندىك بەرەدى.
مينيسترلىك باعانىڭ كوتەرىلۋى ۋاقىتشا شارا ەكەنىن اتاپ ءوتتى. نارىقتاعى جاعداي وزگەرگەن سايىن جانارماي باعاسى قايتا قارالاتىنى ايتىلدى.
