مايدان شەبىنەن جىراقتا جاتقان رەسەيدىڭ كۋريل ارالدارىندا جانارماي ساتۋ ىسىنە قاتاڭ شەكتەۋ ەنىگىزلدى. ءبىر ادامعا كۇنىنە بار بولعانى 10 ليتر بەنزين الا الادى. جانارماي قۇيۋ ستانسالارى بەنزيندى ەڭ الدىمەن جەدەل جاردەم، ءورت سوندىرۋشىلەر، قۇقىق قورعاۋ ورگاندارى جانە كوممۋنالدىق قىزمەت سەكىلدى تىرشىلىكتى قامتاماسىز ەتەتىن قۇرىلىمدارعا بەرۋدە.
بۇل ۋاقىتشا داعدارىس سەكىلدى كورىنگەنىمەن، شىن مانىندە رەسەيدىڭ ەنەرگەتيكالىق جۇيەسىندەگى ءالسىز تۇسىن ايقىن كورسەتىپ بەردى.
سوڭعى اپتالاردا ۋكراين دروندارىنىڭ سوققىسىنان رەسەيدەگى ءىرى ءتورت مۇناي وڭدەۋ زاۋىتى ىستەن شىعاردى. ولار – ساراتوۆ، سىزران، نوۆوكۋيبىشەۆسك، ۆولگوگرادتاعى مۇناي وڭدەۋ زاۋىتتارى. اتالعان زاۋىتتار رەسەيدىڭ باتىس پەن ورتالىق ايماقتارىنا وتىن جەتكىزەتىن ستراتەگيالىق توراپتار بولعان.
بۇعان ماسكەۋ مەن ماسكەۋ وبلىسىن قامتاماسىز ەتەتىن ريازانداعى «روسنەفت» زاۋىتى قۋاتىنىڭ جارتىسىن توقتاتقانىن قوسىڭىز. ال كراسنودار ولكەسىندەگى سلاۆيانسك، افيپسك، روستوۆ ماڭىنداعى نوۆوشاحتينسك زاۋىتتارىنا جاسالعان دروندىق شابۋىلدار جالپى ءوندىرىستىڭ 13 پايىزىن توقتاتقان.
وسى سوققىلاردىڭ سالدارىن قيىرداعى كۋريل ارالدارى ايقىن سەزە باستادى. گەوگرافيالىق جاعىنان جىراق، لوگيستيكاسى قيىن بۇل وڭىردە بەنزين تاپشىلىعى وتە جىلدام بايقالدى. ويتكەنى تەڭىز ارقىلى جەتكىزىلەتىن جانارمايدىڭ ءار ءليترى رەسەيدىڭ ىشكى نارىعىنداعى ءوندىرىس پەن قويمالاردىڭ جاعدايىنا تاۋەلدى. ارالدا قالىپتى تىرشىلىككە قاجەتتى جانارماي كولەمى كۇرت ازايعاندىقتان، جەرگىلىكتى بيلىك ورىندارى ءماجبۇرلى تۇردە نورمالاۋ رەجيمىن ەنگىزگەن.
قاراپايىم تۇرعىندارعا جەتكىلىكتى بەنزين بەرە الماي وتىرعان ەلدە الداعى ۋاقىتتا كوپتەگەن سۇراقتار تۋىنداۋى مۇمكىن.
الەمدىك تاجىريبەدە مۇنداي ستسەناريدىڭ ارتى اۋىر بولاتىنىن تالاي رەت دالەلدەنگەن. 1990-جىلدارى پارسى شىعاناعى سوعىسىندا يراك مۇناي ينفراقۇرىلىمىنان ايىرىلعان كەزدە ەكونوميكاسى بىرنەشە ايدا كۇيرەگەنى ەسىمىزدە. ال ليۆياداعى سوعىس كەزىندە دە مۇناي زاۋىتتارىنا سوققى جاسالعاندا ەلدىڭ بۇكىل قارجى جۇيەسى شايقالعان بولاتىن. قازىر رەسەيدە وسىعان ۇقساس پروتسەسس جۇرۋدە.
