ءيا، قولىمىز بار، اياعىمىز بار، شۇكىرشىلىك. ەڭ باستىسى — ميىمىز بار. الدەبىر مۇسىلمان قۇربان ايتقا سويعان قويىنىڭ قان-جىن ساسىعان ىشەك-قارنىن كەشە كەشكىلىك باقشامىزدىڭ شەتىنە كومدىك. سودان سوڭ ساسىپ جاتقان جەرىن جۋدىق.
ءيا، ىشەك-قارنى ءبىزدىڭ ءۇيدىڭ بۇرىشىنا تاستالعان قويدىڭ قۇربان ايتقا وراي سويىلعانى حاق. ويتكەنى، تۋرا وسىنداي جاعداي 18 جىلدا بەسىنشى رەت قايتالانىپ تۇر. بۇعان دەيىن تاعى ەكى رەت ىشەك-قارىن، ءبىر رەت تەرى، ءبىر رەت تەرى سيراقتارىمەن بىرگە تاستالعان. بۇل جاعداي نەگە قۇدايدىڭ جاي كۇنىندە ەمەس، جاڭا جىلدا ەمەس، 1 مامىردا ەمەس، حريستيانداردىڭ پاسحاسىندا ەمەس، تۋرا قۇربان ايتتا كورىنىس بەرەدى؟ دەمەك، قۇربان ايتقا قاتىستى سويىلعانى اسپانداعى ايدان دا انىق.
قويدى مۇسىلمان سويعانى دا داۋسىز. ۇلكەن اۋىلدىڭ ءبىز تۇراتىن بولىگىندەگى ۇزىنىنان ءۇش، كولدەنەڭىنەن ءتورت كوشەلىك ورامىن قاراساق، ءبىر نەمىس، ەكى ورىس تۇرادى. تاعى ءبىر ۇلكەن ءۇيدى قىتايلىقتار جالدايدى. باسقاسى — قازاق، ۇيعىر، تۇرىك — ءدىن مۇسىلمان قاۋىمىنان. قىتايلار قوي سويدى دەگەن كۇدىكتى بىردەن الىپ تاستايمىز. نەمىس كورشى ءوزىنىڭ اۋلاسىنىڭ سىرتىنا ءبىز اۋلانىڭ ىشىنە قيمايتىن قۇندى ماتەريال توسەپ تاستاعان. پىشىلداتىپ سونى جۋادى دا جاتادى. بارىپ سۋرەتكە ءتۇسىرىپ كەلدىك، دالەل ءۇشىن. ءبىر كوشە ارىدەگى ورىس ايەل بۇرالقى يتتەردى اسىرايدى. ءبىز سۇيەك-ساياقتى ساقتاپ، سوعان بەرەمىز. انىعىندا ءوزى الىپ كەتەدى. بازاردان ارزانعا تاۋىقتىڭ ونى-مۇنىسىن ساتىپ الاتىنىن ايتادى. ونىڭ قوي سويىپ، ىشەك-قارنىن لاقتىرىپ تاستاۋى — ءۇش ۇيىقتاسا تۇسىنە كىرمەس جاعداي. ەندى تاعى ءبىر ورىس كورشى قالدى. ءتورت كىشكەنە بالاسى بار، ءوزى كاسىپكەر. بار ازىق-تۇلىكتى “جەتكىزۋ قىزمەتى” ارقىلى اكەلگىزەدى. دايىن تاماقتى دا تاپسىرىسپەن العىزادى. كۇنىنە ەكى رەت ەسىك الدىنا سول قىزمەتتىڭ كولىگى كەلىپ تۇرادى. ول دا قوي سويىپ، ىشەك-قارنىن لاقتىرىپ تاستاماسى قۇدايعا ايان شىعار. سونىمەن قويدىڭ قۇربان ايتقا سويىلعانى، ىشەك-قارنىن سول مۇسىلماننىڭ تاستاعانى ءبىز ءۇشىن داۋسىز.
ال نەگە داۋرىقتىرماي كومە سالمادىق؟ ءبىرىنشى جولى، ەكىنشى، ءۇشىنشى، ءتىپتى ءتورتىنشى جولى سولاي ىستەگەنبىز. ەندى شەكتەن شىعىپ تۇر عوي. الگى “بالام، ىستىكتەن شىعىپ كەتتىڭ” دەيتىن تامسىلدەگى سياقتى.
قازاقستان ءتارتىپ ساقتالعاندا عانا داميدى. وركەندەيدى. ءتارتىپ بولماسا مەملەكەتتە ىستەلىپ جاتقان يگى تىرلىكتىڭ ءبارى بەكەرگە كەتەدى. ال كوشەگە قويدىڭ بوق ساسىعان ىشەك-قارنىن تاستاپ كەتۋ — ءتارتىپتى ورەسكەل بۇزۋ. مۇنى اكىمدىك پەن پوليتسيا قاداعالاۋى، بۇعان جۇقپالى اۋرۋلار تارالماۋىنا جاۋاپتى قىزمەت قوڭىراۋ قاعۋى كەرەك ەدى. ۇشەۋلەپ ءتارتىپ بۇزعان ادامدى تاۋىپ جونگە شاقىرۋى كەرەك ەدى. سول سەبەپتى كورسىن، قاتاڭ با، جەڭىل مە شارا قولدانسىن دەپ بىردەن كومە سالمادىق.
ءبىز — الدىمەن ازاماتپىز. قازاقستان دەگەن مەملەكەتتىڭ ازاماتىمىز — سول ماڭىزدى، ال قاي ءدىندى ۇستاناتىنىمىز، بالكىم ۇستانبايتىنىمىز سونشالىقتى ماڭىزدى ەمەس. بۇل وقيعادان تاعى ءبىر ءتۇيىن تۇيدىك. قازاق ءۇشىن ەڭ قاۋىپتىسى — ماڭايداعى، الىستاعى كورشىلەر ەمەس، قازاقتىڭ ءوز ىشىندەگى اسىرە دىنشىلدىك. بىزدەن بۇرىن مۇنى مۇحتار ماعاۋين ايتىپ كەتكەن-ءدى. اۋليە ەكەن جارىقتىق!
