رەسەيگە جالدانعان جاۋىنگەر، الەۋمەتتىك جەلىلەردە قازاقستاندىقتاردى سوعىسقا بەلسەندى تارتۋشىلاردىڭ ءبىرى ۆياچەسلاۆ ترەتياكوۆ ۋكراينادا رەسەي جاعىندا سوعىسىپ جۇرگەن 3 قوستانايلىقتىڭ كوز جۇمعانىن حابارلادى. بۇل تۋرالى ارلەن باتەنوۆ ەسىمدى جەلى قولدانۋشىسى جازعان، دەپ حابارلايدى “ادىرنا” ۇلتتىق پورتالى.
«بۇگىن سوعىسقا ەرىكتى قاتىسۋشى قازاقستاندىقتار اراسىندا العاش رەت بىرنەشە ادام قايتىس بولدى. مەنىڭ قوستانايدان كەلگەن 3 جەرلەسىم حاركوۆتا جارىلعان مينانىڭ استىندا قالىپ، كوز جۇمدى. ءبىز قايدا بارا جاتقانىمىزدى بىلدىك. تۇبىندە جەڭىسكە جەتەمىز جانە دۇشپاندى تالقاندايمىز! مەن باۋىرلارىمدى ماقتان تۇتامىن، ولار ناعىز ەرلىك كورسەتتى» دەلىنگەن ونىڭ الەۋمەتتىك جەلىدەگى جازباسىندا.
ونىڭ ايتۋىنشا، ترەتياكوۆ قوستانايدا تۋعان. سوندا كۇزەتشى، جۇك تاسىمالداۋشى، ۋشۋدان جاتتىقتىرۋشى بولىپ جۇمىس ىستەگەن. دونباستا سوعىسقا قاتىسقان، ۋكراينا بازاسىندا اسكەري قىلمىسكەر رەتىندە تىركەلگەن.
Orda.kz ءتىلشىسىنىڭ حابارلاۋىنشا، ونىڭ دوستارىنا جۇرگىزىلگەن تالداۋ ناتيجەسى رەسەيدىڭ يمپەريالىق ساياساتىن كورسەتەدى. الەۋمەتتىك جەلىدە ولار پاتەرلەرىندە رف تۋىن ۇستاپ، دونباس ءۇشىن سوعىسۋعا ۇگىتتەيدى، ۋكرايندىقتاردى ولتىرۋگە شاقىرادى. سويتە تۇرا قازاقستاندا تىنىش ءومىر ءسۇرىپ، جۇمىس ىستەپ جاتىر.
«وسىنداي رەسەيدى جاقتايتىن، ۇلتتىق قاۋىپسىزدىككە قاۋىپ توندىرەتىن توپتار وتە كوپ. ولار ءراشيزمدى اشىق ناسيحاتتايدى، قازاقستاندىقتاردى ۋكرايناداعى سوعىسقا تارتىپ جاتىر، سونداي-اق قازاقستاندى رەسەيگە قوسۋدى بەلسەندى قولدايدى» دەلىنگەن جازبادا.
”ادىرنا” ۇلتتىق پورتالى
