Taldyqorǵan qalasyndaǵy Nazarbaev Zııatkerlik mektebinde Aýǵan soǵysynyń ardagerlerimen kezdesý ótti.
«Aýǵanstannyń tiri jady» - osyndaı ataýmen Keńes áskerleriniń shekteýli kontıngentiniń Aýǵanstannan shyǵarylǵanyna 34 jyl tolýyna oraı Zııatkerlik mektebiniń jataqhanasynda is-shara ótti.
Kezdesý qonaqtary Aýǵan soǵysynyń ardagerleri – Aınekov Marat Seıtaıuly, Omarov Amangeldi Jumahanuly, Dáýletov Mırambaı Aıdynuly boldy.
Jaýynger-ınternaıonalıster Aýǵanstandaǵy oqıǵalar, keńes jaýyngerleriniń áskerı ómiri, soǵys qıyndyqtary jáne jergilikti soǵys ardagerleriniń qazirgi ýaqytta ne istep jatqany týraly áńgimeledi.
Atalmysh keshke oqýshylar erekshe daıyndalyp, óz ónerlerin pash etti.
Biz Aýǵan soǵysynyń tarıhyn, tikeleı kýágerlerdiń estelikteri arqyly bilýge, olardyń jat jerde bolyp jatqan oqıǵalarǵa jáne odan keıingi ómirge kózqarasyn bilýge biregeı múmkindik aldyq, — deıdi 10-synyp oqýshysy Aqjol Bolat.
Óskeleń urpaqqa Otandy súıýdiń, patrıottyq boryshyn óteýdiń ne ekenin óz úlgisimen kórsete bilgen Uly Otan soǵysynyń ardagerler qatary azaıyp barady, ornyna Aýǵan soǵys jaýyngerleriniń kelúin NIS jataqhanasynyń tárbıeshileri óz sózderinde atap aıtty.
Mundaı kezdesýler óskeleń urpaq úshin óte mańyzdy. Óıtkeni, 18-19 jas aralyǵyndaǵy jas uldar, aǵalar, ákeler osy soǵysta qaza tapty. Búgingi kezdesý jastardyń boıynda qazirgi qoǵam ómirinde patrıottyq sezim, óz eliniń ótkenine qurmetpen qaraý úshin Otan aldyndaǵy boryshyn adal atqarýǵa úıretedi, – deıdi tárbıeshiler Aıgúl Nurahmetova men Nazym Moldahmetova.
Patrıottyq kezdesý Qazaqstan Áýe qorǵanysy kúshteriniń Taldyqorǵan qalasyndaǵy avıabazasyna ekskýrsııamen jalǵasty.
