Алматының Наурызбай ауданы Шұғыла шағынауданында №223 жалпы білім беретін мектеп пайдалануға берілді. Бұл туралы қалалық білім басқармасының өкілдері хабарлады.
1000-нан астам оқушыға арналған білім ордасы «Жайлы мектеп» («Келешек мектептері») ұлттық жобасы аясында салынған. Қазір мұнда жақын маңдағы шағынаудандарда тұратын 1147 бала білім алып жүр.
Жаңа мектептің ашылуы қарқынды дамып келе жатқан аудандағы оқушы орындарының тапшылығын азайтуға бағытталған. Сәуір айында Наурызбай ауданында екі ірі білім беру нысаны іске қосылды, бұған дейін №41 мектеп ашылған болатын.
Салтанатты ашылу рәсіміне білім беру саласының өкілдері мен сала ардагерлері қатысты.
«Қазіргі таңда мектепте 1147 оқушы оқиды. Бұлар бұрын алыс мектептерге автобуспен қатынап жүрген балалар. Енді біздің шағынауданның балалары үй маңында оқи алады. Бүгінгі оқиға олардың мектепке барып-келуін едәуір жеңілдетеді деп ойлаймын», - деді мектеп директоры Жеңісгүл Сартаева.
Оқыту мемлекеттік тілде жүргізіледі. Қазіргі уақытта 1-сыныптан 10-сыныпқа дейінгі сыныптар жасақталған, ал алдағы уақытта мектеп 1-11 сынып аралығында толық циклде жұмыс істейді.
Мектеп заманауи инфрақұрылыммен жабдықталған. Атап айтқанда, оқу кабинеттері, әртүрлі жас топтарына арналған спорт залдары бар. Сондай-ақ, футбол алаңы, баскетбол және волейбол алаңшалары сынды ашық алаңдар қарастырылған.
Сондай-ақ, жайлы орта қалыптастыруға ерекше көңіл бөлінген. Ғимарат ішінде және мектеп аумағында демалыс аймақтары жабдықталған.
Қала бойынша 2025 жылы әртүрлі бағыттағы 38 білім беру нысаны салынды. «Келешек мектептері» ұлттық жобасы аясында 34 200 орынға арналған 20 мектептің құрылысы жоспарланған, оның 12-сі пайдалануға беріліп үлгерді, қалғандары жыл соңына дейін ашылады.
Жаңа мектептер заманауи білім беру кеңістігін қалыптастырып, сапалы білімді үйге жақын жерде алуға мүмкіндік береді
