Almatynyŋ Nauryzbai audany Şūǧyla şaǧynaudanynda №223 jalpy bılım beretın mektep paidalanuǧa berıldı. Būl turaly qalalyq bılım basqarmasynyŋ ökılderı habarlady.
1000-nan astam oquşyǧa arnalǧan bılım ordasy «Jaily mektep» («Keleşek mektepterı») ūlttyq jobasy aiasynda salynǧan. Qazır mūnda jaqyn maŋdaǧy şaǧynaudandarda tūratyn 1147 bala bılım alyp jür.
Jaŋa mekteptıŋ aşyluy qarqyndy damyp kele jatqan audandaǧy oquşy oryndarynyŋ tapşylyǧyn azaituǧa baǧyttalǧan. Säuır aiynda Nauryzbai audanynda ekı ırı bılım beru nysany ıske qosyldy, būǧan deiın №41 mektep aşylǧan bolatyn.
Saltanatty aşylu räsımıne bılım beru salasynyŋ ökılderı men sala ardagerlerı qatysty.
«Qazırgı taŋda mektepte 1147 oquşy oqidy. Būlar būryn alys mektepterge avtobuspen qatynap jürgen balalar. Endı bızdıŋ şaǧynaudannyŋ balalary üi maŋynda oqi alady. Bügıngı oqiǧa olardyŋ mektepke baryp-keluın edäuır jeŋıldetedı dep oilaimyn», - dedı mektep direktory Jeŋısgül Sartaeva.
Oqytu memlekettık tılde jürgızıledı. Qazırgı uaqytta 1-synyptan 10-synypqa deiıngı synyptar jasaqtalǧan, al aldaǧy uaqytta mektep 1-11 synyp aralyǧynda tolyq siklde jūmys ısteidı.
Mektep zamanaui infraqūrylymmen jabdyqtalǧan. Atap aitqanda, oqu kabinetterı, ärtürlı jas toptaryna arnalǧan sport zaldary bar. Sondai-aq, futbol alaŋy, basketbol jäne voleibol alaŋşalary syndy aşyq alaŋdar qarastyrylǧan.
Sondai-aq, jaily orta qalyptastyruǧa erekşe köŋıl bölıngen. Ǧimarat ışınde jäne mektep aumaǧynda demalys aimaqtary jabdyqtalǧan.
Qala boiynşa 2025 jyly ärtürlı baǧyttaǧy 38 bılım beru nysany salyndy. «Keleşek mektepterı» ūlttyq jobasy aiasynda 34 200 orynǧa arnalǧan 20 mekteptıŋ qūrylysy josparlanǧan, onyŋ 12-sı paidalanuǧa berılıp ülgerdı, qalǧandary jyl soŋyna deiın aşylady.
Jaŋa mektepter zamanaui bılım beru keŋıstıgın qalyptastyryp, sapaly bılımdı üige jaqyn jerde aluǧa mümkındık beredı
