Almatyda Qala künıne orai ūiymdastyrylǧan «KıtapFest» qalalyq kıtap järmeŋkesı bastaldy. Ekı künge josparlanǧan mädeni şaranyŋ alǧaşqy künı Arbat alaŋynda qala tūrǧyndary men qonaqtaryna kıtap älemıne enıp, qalamgerlermen jüzdesıp, ädebi jaŋalyqtarmen tanysuǧa mümkındık berude.
Biyl järmeŋkege 60-tan astam baspa qatysyp, oqyrman nazaryna türlı janr men baǧyttaǧy jaŋa kıtaptar men taŋdauly basylymdardy ūsynyp otyr. Keluşıler özderıne qajettı ädebietterdı taŋdap qana qoimai, otandyq avtorlarmen kezdesıp, şyǧarmaşylyq turaly pıkır almasuǧa mümkındık aldy.
Järmeŋkenıŋ alǧaşqy künınde belgılı aqyn-jazuşylardyŋ qatysuymen ädebi kezdesuler ötude. Qalamgerler öz şyǧarmaşylyǧy, kıtap oqu mädenietınıŋ maŋyzy jäne qazırgı oqyrmannyŋ talǧamy turaly oi bölısıp, köpşılık saualyna jauap berdı.
Kezdesu barysynda jazuşy, dramaturg Älışer Rahat Almaty tūrǧyndaryn Qala künımen qūttyqtap, «KıtapFest» järmeŋkesınıŋ jyl saiyn oqyrman men qalamgerdı jaqyndastyryp, ädebi orta men qala tūrǧyndaryn bır alaŋǧa toǧystyratyn maŋyzdy mädeni şara ekenın atap öttı.
Järmeŋkege kelgen qala tūrǧyndary da şaranyŋ mazmūnyna oŋ baǧasyn berıp, kıtap taŋdauǧa jäne avtorlarmen jüzdesuge qyzyǧuşylyq tanytuda.
«Bügın kıtap järmeŋkesıne arnaiy keldım. Mūnda ärtürlı janrdaǧy kıtaptar köp eken, özıme ūnaǧan bırneşeuın tauyp aldym. Äsırese otandyq avtorlarmen kezdesıp, şyǧarmalary turaly özderınen estu qyzyq boldy», – dedı järmeŋke qonaǧy Almatylyq student Asyljan Bauyrjanūly.
Almatyda kıtapqa degen qyzyǧuşylyqty arttyruǧa, oqyrman men ädebi ortanyŋ bailanysyn nyǧaituǧa baǧyttalǧan jobalar tūraqty türde jüzege asyrylyp keledı. «KıtapFest» järmeŋkesı de osy baǧyttaǧy maŋyzdy mädeni bastamalardyŋ bırı. Mūndai bastamalar kıtap oqu mädenietın qalyptastyruǧa, otandyq ädebiettı keŋınen nasihattauǧa jäne qala tūrǧyndarynyŋ ruhani-mädeni ömırın baiytuǧa baǧyttalǧan.
Aita keteiık, «KıtapFest» qalalyq kıtap järmeŋkesı 19–20 qyrküiek künderı saǧat 10:00-den 18:00-ge deiın Arbat alaŋynda ötedı. Järmeŋkege barlyq qala tūrǧyndary men qonaqtary şaqyrylady
