Иран Сыртқы істер министрлігінің ресми өкілі Исмаил Багаи Иранның дипломатиялық өкілдіктері Самарқандтың мәдени мұрасына қатысты жарияланымдар жасағаннан кейін Өзбекстанмен арада туындаған келіспеушілікке пікір білдірді, деп хабарлайды «Адырна» тілшісі.
Багаидің айтуынша, екі елдің қарым-қатынасы ұзақ тарихқа ие, ал халықтар арасындағы мәдени байланыстар алдағы ынтымақтастықтың маңызды негізі болып қала береді.
«Біз Өзбекстанмен қарым-қатынасқа үлкен мән береміз», – деді Иран Сыртқы істер министрлігінің өкілі.
Сондай-ақ Багаи Иранның кейбір елшілігі қызметкерлерінің жарияланымдары АҚШ тарапына бағытталғанын түсіндірді.
Айта кетейік, 23 қазанда Өзбекстан Сыртқы істер министрлігі Иран елшісі Мұхаммад Әли Эскандариді шақырып, оған наразылық нотасын табыстаған. Бұған Иранның Армения мен Зимбабведегі дипломатиялық өкілдіктері жариялаған жазбалар себеп болған.
X әлеуметтік желісінде Иранның дипломатиялық өкілдіктері АҚШ мемлекеттік хатшысы Марко Рубионың Самарқандтағы Регистан алаңы аясында түсірілген видеосын қайта жариялаған. Жазбалардағы түсіндірмелерде тарихи ғимараттардың сәулеті «парсы-ислам өркениетіне» тән ерекшелік ретінде сипатталған.
Ташкент мұндай түсіндіруді Самарқанд тарихына біржақты әрі саясиландырылған көзқарас деп бағалаған. Өзбекстан Сыртқы істер министрлігі Самарқанд, Бұхара, Хиуа және басқа да тарихи қалалардың мәдени және сәулет мұрасы көптеген ғасыр бойы қалыптасқанын, сондай-ақ өзбек мемлекеттілігінің тарихы мен ұлттық мәдени дәстүрлерін бейнелейтінін атап өткен.
Өзбекстан Иран тарапын даулы жазбаларды әлеуметтік желілерден алып тастауға және болашақта осындай жағдайлардың қайталануына жол бермеу үшін шаралар қабылдауға шақырған.
Сонымен қатар Сыртқы істер министрлігі Өзбекстанның өзара құрмет пен сенімге негізделген Иранмен тату көршілік қарым-қатынасты сақтауға мүдделі екенін мәлімдеген. Алайда Ташкент тарихи және мәдени мұра мәселелерінде өз ұстанымын қорғауды жалғастырмақ.
