İran Syrtqy ıster ministrlıgınıŋ resmi ökılı İsmail Bagai İrannyŋ diplomatiialyq ökıldıkterı Samarqandtyŋ mädeni mūrasyna qatysty jariialanymdar jasaǧannan keiın Özbekstanmen arada tuyndaǧan kelıspeuşılıkke pıkır bıldırdı, dep habarlaidy «Adyrna» tılşısı.
Bagaidıŋ aituynşa, ekı eldıŋ qarym-qatynasy ūzaq tarihqa ie, al halyqtar arasyndaǧy mädeni bailanystar aldaǧy yntymaqtastyqtyŋ maŋyzdy negızı bolyp qala beredı.
«Bız Özbekstanmen qarym-qatynasqa ülken män beremız», – dedı İran Syrtqy ıster ministrlıgınıŋ ökılı.
Sondai-aq Bagai İrannyŋ keibır elşılıgı qyzmetkerlerınıŋ jariialanymdary AQŞ tarapyna baǧyttalǧanyn tüsındırdı.
Aita keteiık, 23 qazanda Özbekstan Syrtqy ıster ministrlıgı İran elşısı Mūhammad Äli Eskandaridı şaqyryp, oǧan narazylyq notasyn tabystaǧan. Būǧan İrannyŋ Armeniia men Zimbabvedegı diplomatiialyq ökıldıkterı jariialaǧan jazbalar sebep bolǧan.
X äleumettık jelısınde İrannyŋ diplomatiialyq ökıldıkterı AQŞ memlekettık hatşysy Marko Rubionyŋ Samarqandtaǧy Registan alaŋy aiasynda tüsırılgen videosyn qaita jariialaǧan. Jazbalardaǧy tüsındırmelerde tarihi ǧimarattardyŋ säuletı «parsy-islam örkenietıne» tän erekşelık retınde sipattalǧan.
Taşkent mūndai tüsındırudı Samarqand tarihyna bırjaqty ärı saiasilandyrylǧan közqaras dep baǧalaǧan. Özbekstan Syrtqy ıster ministrlıgı Samarqand, Būhara, Hiua jäne basqa da tarihi qalalardyŋ mädeni jäne säulet mūrasy köptegen ǧasyr boiy qalyptasqanyn, sondai-aq özbek memlekettılıgınıŋ tarihy men ūlttyq mädeni dästürlerın beineleitının atap ötken.
Özbekstan İran tarapyn dauly jazbalardy äleumettık jelılerden alyp tastauǧa jäne bolaşaqta osyndai jaǧdailardyŋ qaitalanuyna jol bermeu üşın şaralar qabyldauǧa şaqyrǧan.
Sonymen qatar Syrtqy ıster ministrlıgı Özbekstannyŋ özara qūrmet pen senımge negızdelgen İranmen tatu körşılık qarym-qatynasty saqtauǧa müddelı ekenın mälımdegen. Alaida Taşkent tarihi jäne mädeni mūra mäselelerınde öz ūstanymyn qorǧaudy jalǧastyrmaq.
BŪŪ Qauıpsızdık Keŋesı İrannyŋ Parsy şyǧanaǧyndaǧy körşı memleketterge şabuylyn toqtatudy talap ettı
