قازاقستاننىڭ تۇڭعىش پرەزيدەنتى نۇرسۇلتان ءابىشۇلى نازارباەۆ استانا قالاسىنداعى ورتالىق مەشىتكە بارىپ قايتتى، دەپ حابارلايدى "ادىرنا" ۇلتتىق پورتالى.
بۇل تۋرالى مەشىتتىڭ ازانشىسى قۋانىش سەيتحانوۆ ءوزىنىڭ الەۋمەتتىك جەلىدەگى پاراقشاسىندا حابارلادى.
جەلىدە جاريالانعان بەينەجازبادا ەكس-پرەزيدەنتتىڭ قاۋىپسىزدىك قىزمەتىنىڭ سۇيەمەلدەۋىمەن مەشىتكە كىرىپ كەلە جاتقانى كورىنەدى. بەينەجازبا اۆتورىنىڭ ايتۋىنشا، نازارباەۆ جاقسى كوڭىل كۇيدە بولعان.
“قازاقستاننىڭ تۇڭعىش پرەزيدەنتى نۇرسۇلتان ءابىشۇلى نازارباەۆ باس مەشىتكە كەلدى”، – دەپ جازدى ازانشى.
نۇرسۇلتان نازارباەۆ قازاقستاندى 1991 جىلدان باستاپ 2019 جىلعا دەيىن باسقارعان. پرەزيدەنتتىك وكىلەتىن توقتاتقاننان كەيىن دە ول قاۋىپسىزدىك كەڭەسىنىڭ توراعاسى ءارى «ەلباسى» — ۇلت كوشباسشىسى رەتىندە ىقپالىن ساقتاپ قالعان. الايدا 2022 جىلعى قاڭتار وقيعالارىنان كەيىن ونىڭ ساياسي مارتەبەسى مەن وكىلەتتىگى ايتارلىقتاي شەكتەلدى.
