شابۋىل تۋرا 2020 جىلعى «سۇلەيماني كەگى» وپەراتسياسى ستسەناريىمەن قايتالاندى. 2020 جىلى اقش يراننىڭ ايگىلى قولباسشىسى كاسەم سۇلەيمانيدى ءولتىردى. يران بيلىگى اقش-تىڭ يراكتاعى بازاسىن اتقىلادى. كەيىن يراننىڭ جانە اقش-تىڭ شەنەۋنىكتەرى ءانونيمدى تۇردە «بازاعا شابۋىل جاسايتىنى جايلى تەگەران ديپلوماتيالىق ارنالار ارقىلى ۆاشينگتونعا الدىن-الا ەسكەرتتى» دەدى. ءسويتىپ ءبارى ريزا بولدى. اقش وزىنە باستى قاۋىپتىڭ ءبىرى دەپ ساناعان سۇلەيمانيدى ءولتىردى، اياتوللا رەجيمى «كەك العانداي» بولدى، يران حالقى رەجيمنىڭ مىقتى ەكەنىنە سەندى. ترامپ تا ريزا، تەگەران دا ريزا.
ەندى بۇگىن تۋرا وسى قايتالانعان سياقتى. ء«ال-ۋدەيد» بازاسى سوققىعا دەيىن ەۆاكۋاتسيالانعانى ايتىلدى. ءبىر قىزىعى، ترامپ بارلىعىن جايىپ سالدى. ەل باسشىلارى بۇنداي اقپاراتتى ايتا بەرمەيدى. بىراق ترامپ ەمەس. ول كەيدە ايتىلمايتىن اقپاراتتى ايتىپ قالاتىنى بار. ول جاڭا عانا بىلاي دەدى: «يادرولىق نىساندارىن جويعانىمىزعا يران رەسمي تۇردە جاۋاپ بەردى جانە ءبىز كۇتكەندەي ولاردىڭ جاۋابى وتە ءالسىز بولدى، ءبىز شابۋىلدى ناتيجەلى تۇردە تويتاردىق. ولار 14 زىمىران اتتى، 13 زىمىراندى قاعىپ تۇسىردىك، ال بىرەۋى قاۋىپسىز ايماققا تۇسەتىن بولعاندىقتان نازار اۋدارمادىق. مەن بىردە-ءبىر امەريكالىق زارداپ شەكپەگەنىنە جانە ەشقانداي شىعىن بولماعانىنا قۋانىشتىمىن. مەن يرانعا الدىن الا ەسكەرتۋ جاساعانى ءۇشىن العىس ايتقىم كەلەدى - بۇل بىردە-ءبىر ادامنىڭ ءومىرىن جوعالتپاۋعا جانە جاراقات الماۋىنا مۇمكىندىك بەردى. ەندى يران تۇراقتىلىق پەن بەيبىتشىلىك جولىنا تۇسە الادى جانە مەن ءيزرايلدى دە سولاي ەتۋگە شاقىرامىن»، - دەيدى ترامپ.
وسىمەن اقش-يران تەكەتىرەسى ءبىرشاما باسەڭدەگەن سياقتى. ەندى جاقىن ارالىقتا يزرايل-يران قاقتىعىسى دا توقتاۋى مۇمكىن. قاقتىعىس اياقتالعان سوڭ، ەكى تاراپ تا جەڭگەنىن جاريالايدى. ول ىشكى اۋديتوريا ءۇشىن ايتىلاتىن دۇنيە عوي. يران بيلىگى «سيونيستەردى جويدىق»، «زىمىرانمەن توپەلەدىك»، «تەمىر كۇمبەزدەن زىمىراندارىمىز ءوتىپ كەتتى» دەيدى. يزرايل «يرانعا وڭدىرماي سوققى جاسادىق» دەيدى. شابلوندى سوزدەر عوي.
بىراق فاكت دەگەن بار. يزرايل يران تاراپىنان ءتونۋى ىقتيمال قاۋىپتى 10-15 جىلعا شەگەردى. يراننىڭ پروكسيلەرىن السىرەتتى. بىلتىر حاماس، حەزبوللا، حۋسيتتەر سوققى الدى. ەندى مىنە يراننىڭ ءوزىن اسكەري تۇرعىدان سوققىلادى. اۋە قورعانىس جۇيەسىن السىرەتتى، اۆياتسياسىنىڭ باسىم بولىگىن قۇرتتى، زىمىران قورىن ازايتتى، زىمىران اتۋ قوندىرعىلارىنىڭ باسىم بولىگىن جويدى، اسكەري نىساندار مەن يادرولىق كەشەندەرىن سوققىلادى، يەمدەنۋ وتە قيىن تسەنتريفۋگالاردى اتقىلادى، يادرولىق سالادا مول تاجىريبەگە يە عالىمداردى، اسكەري سالادا ۇلكەن وپەراتسيالاردى جوسپارلاي الاتىن ءبىراز قولباسشىلاردى ءولتىردى. بۇنىڭ ءبارى يران تاراپىنان تونەتىن قاۋىپتى كەمى 10-15 جىلعا شەگىندىرەدى.
يزرايل دە ءبىرشاما شىعىنعا ۇشىرادى جانە ونىڭ ەڭ باستىسى ەكونوميكالىق تۇرعىدان ەدى. يزرايل وپپوزيتسياسى ەندى نەتانياحۋ بيلىگىن قاتاڭ سىنايتىن بولادى جانە ونى بيلىكتەن تايدىرۋعا تىرىسۋى مۇمكىن. بۇعان دەيىن دە تىرىسقان. «تەمىر كۇمبەز نەگە بارلىق زىمىراندى اتىپ تۇسىرمەدى» دەپ باستايدى جانە گازادا ءالى دە تۇتقىندا وتىرعان جاندار جايلى ايتادى.
بىراق سوعىس ءالى بىتكەن جوق. يران-يزرايل اراسىنداعى قاقتىعىس جالعاسىپ جاتىر. قىزۋ فازا اياقتالمادى. ەگەر جاقىن كۇندەرى سوعىستىڭ قىزۋ فازاسى اياقتالسا، وندا ارتىنشا كەلىسسوز باستالادى. كەلىسسوزدە اقش يران تاراپىن قيىن شارتتارعا كوندىرۋگە تىرىسادى. مىسالى بايىتىلعان ۋران قورىن ءۇشىنشى ءبىر ەلگە بەرۋ، يادرولىق باعدارلاماسىن توقتاتۋ، بەيبىت اتومعا قاجەت بايىتىلعان ۋراندى سىرتتان ساتىپ الۋ، زىمىران باعدارلاماسىن وزگەرتۋ دەگەن سياقتى. ادەتتە قاقتىعىستان كەيىنگى كەلىسسوزدەر اۋىر وتەدى. كورەرمىز. بىزدىكى جاي وي عوي.
