بۇگىن، استانا ۋاقىتىمەن 00:32- دە بايقوڭىر عارىش ايلاعىنىڭ №31 الاڭىنان «سويۋز-2.1ا» زىمىران تاسىعىشى «پروگرەسس مس-31» جۇك كەمەسىمەن بىرگە ۇشىرىلدى، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
«پروگرەسس مس-31» كەمەسىنىڭ حالىقارالىق عارىش ستانتسياسىمەن ءتۇيىسۋى جوسپار بويىنشا ەكى تاۋلىكتەن كەيىن، 4 شىلدە كۇنى وجۇزەگە اسادى.
«پروگرەسس مس-31» جۇك كەمەسىنىڭ ۇشىرىلۋى حالىقارالىق عارىش ستانتسياسى باعدارلاماسىن قامتاماسىز ەتۋ اياسىندا جۇزەگە اسىرىلدى. رەسەيلىك جۇك كەمەسى حالىقارالىق ستانتسياعا 2625 كگ جۇك جەتكىزەدى. ونىڭ ىشىندە: 950 كگ وربيتانى ۇستاپ تۇرۋعا ارنالعان وتىن، ازىق-تۇلىك، سۋ، اۋا جانە عارىشكەرلەرگە ارنالعان سالەمدەمەلەر، «رودنيك» جۇيەسىنە ارنالعان 420 ليتر اۋىز سۋ، 50 كگ ازوت، سونداي-اق ستانتسيانى قوسىمشا جابدىقتاۋعا ارنالعان 1205 كگ قۇرال-جابدىق پەن «ۆيرتۋال»، «بيودەگراداتسيا»، «فۋللەرەن»، «بيوپوليمەر»، «يمپۋلس» جانە «ميراج» عىلىمي ەكسپەريمەنتتەرىنە ارنالعان جابدىقتار بار.
«سويۋز» زىمىرانىنىڭ كورپۋسىنا كەڭەس-امەريكالىق «سويۋز-اپوللون» باعدارلاماسىنىڭ 50 جىلدىعىنا ارنالعان پوستەر
بەلگىلى بولعانداي، 1975 جىلعى 15 شىلدەدە بايقوڭىر عارىش ايلاعىنان الەكسەي لەونوۆ پەن ۆالەري كۋباسوۆ وتىرعان «سويۋز-19» كەمەسى ۇشىرىلعان. جارتى ساعات وتكەن سوڭ، كاناۆەرال مۇيىسىنەن ءۇش استروناۆت – توماس ستاففورد، دونالد سلەيتون جانە ۆەنس براند وتىرعان امەريكالىق «اپوللون» كەمەسى ۇشىرىلدى.
1975 جىلى 17 شىلدەدە «سويۋز» بەن «اپوللون» كەمەلەرى ءتۇيىسىپ، العاش رەت ەكى شەت ەلدىك كەمەدەن تۇراتىن وربيتالىق بايلانىس ورناتقان. ۇشۋ بارىسىندا ەكيپاج مۇشەلەرى ءبىر كەمەدەن ەكىنشىسىنە ءتورت رەت ءوتتى. ال 19 شىلدەدە كەمەلەر اجىراپ، حالىقارالىق ميسسيا اياقتالعان.
ەسكە سالا كەتەيىك، قازىرگى ۋاقىتتا حالىقارالىق عارىش ستانتسياسىندا 73-ەكسپەديتسيانىڭ حالىقارالىق ەكيپاجى جۇمىس ىستەۋدە. قۇرامىندا: ستانتسيا كومانديرى تاكۋيا ونيسي (جاپونيا), بورتينجەنەرلەر – سەرگەي رىجيكوۆ، الەكسەي زۋبريتسكي، كيريلل پەسكوۆ (بارلىعى – رەسەي), دجوناتان كيم، ەنن ماككلەين، نيكول ايەرس (بارلىعى – اقش).
