ۆەدومستۆولىق ماراپاتتاردىڭ ورىنسىز تاراتىلۋ دەرەگى تىركەلگەن جوق. بۇل تۋرالى مادەنيەت جانە اقپارات مينيسترلىگىنەن مالىمدەدى، دەپ حابارلايدى “ادىرنا” ۇلتتىق پورتالى.
“مينيسترلىك مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيانىڭ (بۇدان ءارى – رەسپۋبليكالىق كوميسسيا) جۇمىس ورگانى رەتىندە تۇراقتى تۇردە قولدانىستاعى بارلىق ۆەدومستۆولىق ناگرادالارعا تالداۋ جۇمىستارىن جۇرگىزەدى. ناتيجەسى رەسپۋبليكالىق كوميسسيا وتىرىسىندا تالقىلانادى. جالپى ۆەدومستۆولىق ناگرادالار قىزمەتتىك مىندەتتەرىن ۇلگىلى ورىنداعانى، شىعارماشىلىق بەلسەندىلىگى، ءمىنسىز قىزمەتى، ەڭبەك قىزمەتىندە باسقا دا جەتىستىكتەرى مەن وزگە دە سىڭىرگەن ەڭبەگى ءۇشىن قىزمەتكەرلەردىڭ، جۇمىسكەرلەردىڭ جانە وزگە دە تۇلعالاردىڭ ەڭبەكتەرىن كوتەرمەلەۋ جانە ىنتالاندىرۋ نىساندارىنىڭ ءبىرى. سول سەبەپتەن ۆەدومستۆولىق ماراپاتتاردىڭ ورىنسىز تاراتىلۋى تۋرالى دەرەك تىركەلمەگەنىن مالىمدەيمىز”، - دەدى مينيسترلىكتەن اگەنتتىكتىڭ ساۋالىنا وراي.
وسى جىلدىڭ سوڭىنا قاراي «ۆەدومستۆولىق ناگرادالاردىڭ اقپاراتتىق جۇيەسى» پلاتفورماسى پيلوتتىق رەجيمدە پايدالانۋعا بەرىلەتىنىن جازعان ەدىك.
ەستەرىڭىزگە سالا كەتسەك، بيىل بۋرابايدا وتكەن ۇلتتىق قۇرىلتايدىڭ 4-وتىرىسىندا مەملەكەت باسشىسى قاسىم-جومارت توقاەۆ سوڭعى جىلدارى مەملەكەتتىك ناگرادالار ماسەلەسى قايتا قارالىپ، ءبىر جۇيەگە تۇسىرىلگەنىن ايتقان ەدى.
“ەندى ۆەدومستۆولىق ماراپاتتاردى رەتكە كەلتىرۋ قاجەت. مەملەكەتتىك ورگاندار بۇل جۇمىستى نازاردان تىس قالدىردى. ناقتى ەرەجە جوق، بارىنە ورتاق مالىمەتتەر قورى دا جوق. سونىڭ كەسىرىنەن كەيبىر ماراپاتتار ورىنسىز تاراتىلىپ جاتىر. ءتىپتى، ءبىر مەملەكەتتىك ورگاننىڭ توسبەلگىسىن ءبىر ادام بىرنەشە رەت العان جايتتار دا كەزدەسەدى. مەكەمەلىك ماراپات – ناعىز بىلىكتى ماماندارعا عانا بەرىلەتىن، سول ارقىلى كاسىبي مارتەبەنى كوتەرەتىن ماڭىزدى ناگرادا. بۇعان بەي-جاي قاراۋعا بولمايدى”، - دەگەن بولاتىن پرەزيدەنت.
