قارت جۋرناليست، پروفەسسور كاكەن قامزين الاياقتاردىڭ ارباۋىنا ءتۇسىپ، جالعىز باسپاناسىنان ايىرىلماق، دەپ حابارلايدى “ادىرنا” ۇلتتىق پورتالى.
بۇل تۋرالى جۋرناليست ايبار ولجاي جەلىدەگى پاراقشاسىندا جازدى.
ونىڭ ايتۋىنشا، ارداگەر ۇستاز كينوداعىداي ستسەناريمەن الدانىپ، جالعىز ۇيىنەن ايىرىلىپ قالماق.
الاياقتار الدىمەن «ەنەرگوسبىت» وكىلدەرى رەتىندە حابارلاسىپ، جسن، مەكەنجايى، پاتەر ءنومىرى سياقتى جەكە مالىمەتتەرىن ءبىلىپ العان. كەيىن ءوزىن ۇلتتىق قاۋىپسىزدىك كوميتەتىنىڭ قىزمەتكەرىمىز دەپ تانىستىرعان ادام تەلەفون شالىپ، «بىرەۋلەر ءۇيىڭىزدى تارتىپ الماقشى» دەپ قورقىتىپ، ءۇيىن تەز ساتۋعا كوندىرگەن. «اقشانى ۇلتتىق بانكتىڭ ارنايى شوتىنا سالاسىز» دەگەن جەلەۋمەن پروفەسسور ءۇيىن نوتاريۋس ارقىلى ساتىپ، العان قاراجاتىن الاياقتار جىبەرگەن كۋرەرگە تابىستاپ جىبەرگەن.
قازىرگى ۋاقىتتا بۇل وقيعا بويىنشا الماتى قالاسى اۋەزوۆ اۋداندىق پوليتسيا باسقارماسى قىلمىستىق ءىس قوزعاعان. ايبار ولجايدىڭ ايتۋىنشا، الماتى قالالىق پوليتسيا دەپارتامەنتى بۇل ىسكە ءجىتى نازار اۋدارۋى ءتيىس. سونىمەن قاتار، جۋرناليست ىشكى ىستەر ءمينيسترى ەرجان سادەنوۆتەن ءىستى جەكە باقىلاۋىنا الۋدى سۇرايدى.
قازىر كاكەن قامزين الماتىداعى ءوز ۇيىندە جالعىز. ول پاتەرىن يەمدەنىپ العانداردىڭ تاراپىنان تونگەن قاۋىپكە بايلانىستى ءۇي ىشىندە بارريكادا جاساپ، ءوزىن قورعاۋعا ءماجبۇر. ايبار ولجايدىڭ ايتۋىنشا، جاڭا قوجايىندار تۇندە كەلىپ، قوقان-لوققى كورسەتىپ جاتىر.
