6 شىلدەدە تۇڭعىش پرەزيدەنت نۇرسۇلتان نازارباەۆ 85 جاس تولدى. بيىل ەكس-باسشىنىڭ تۋعان كۇنىنە بايلانىستى مەرەكەلىك شارالار وتكىزىلمەدى، دەپ حابارلايدى «ادىرنا» ءتىلشىسى.
مەرەيتوي قارساڭىندا قازاقستاننىڭ قازىرگى پرەزيدەنتى قاسىم-جومارت توقاەۆ نۇرسۇلتان نازارباەۆتى قۇتتىقتادى. ول نازارباەۆتىڭ جاڭا داۋىردەگى قازاق مەملەكەتتىلىگىنىڭ باستاۋىندا تۇرعانىن اتاپ ءوتتى. سونداي-اق قازاقستاننىڭ قالىپتاسۋى مەن دامۋىنا زور ۇلەس قوسقانىن مالىمدەدى.
6 شىلدەدە وزبەكستان باسشىسى شاۆكات ميرزيوەۆ نۇرسۇلتان نازارباەۆقا تەلەفون سوعىپ، وعان زور دەنساۋلىق، اماندىق پەن تابىس تىلەدى. وزبەك پرەزيدەنتى وزبەك-قازاق اراسىنداعى دوستىق، تاتۋ كورشىلىك، ستراتەگيالىق ارىپتەستىك پەن وداقتاستىق قارىم-قاتىناستاردىڭ قازىرگى دەڭگەيى جوعارى باعالاناتىنىن جانە بارلىق باعىت بويىنشا كوپجاقتى ىنتىماقتاستىقتىڭ قارقىندى دامىپ كەلە جاتقانىن اتاپ ءوتتى.
سونداي-اق نۇرسۇلتان نازارباەۆتى بەلارۋس پرەزيدەنتى الەكساندر لۋكاشەنكو قۇتتىقتادى.
ء«سىزدىڭ دانالىعىڭىز بەن ومىرلىك تاجىريبەڭىز اينالاڭىزداعى ادامداردى شابىتتاندىرا بەرسىن»، – دەدى باسشى.
ايتا كەتەيىك، نۇرسۇلتان نازارباەۆ 1991 جىلدان 2019 جىلعا دەيىن ەل پرەزيدەنتى بولعان ەدى. 1989-1991 جىلدارى ول قازاقستان كوممۋنيستىك پارتياسى ورتالىق كوميتەتىنىڭ ءبىرىنشى حاتشىسى قىزمەتىن اتقارعان.
نازارباەۆ بيلىكتەن كەتكەننەن كەيىن دە بىرقاتار ماڭىزدى لاۋازىمداردى ساقتاپ قالدى. اتاپ ايتساق، 2021 جىلعا دەيىن «نۇر وتان» (قازىرگى Amanat - رەد.) پارتياسىنىڭ توراعاسى، ال 2022 جىلعا دەيىن قاۋىپسىزدىك كەڭەسىنىڭ باسشىسى بولدى. ودان بولەك، نازارباەۆ ۇزاق ۋاقىت «ەلباسى» اتانىپ ءجۇردى، بىراق مۇنداي مارتەبە 2022 جىلى جويىلدى.
