قاجىلىقتان باس تارتقان. تىل ارداگەرى 10 جىل جيناعان قارجىسىن مۇگەدەك بالالارعا تارتۋ ەتتى

712
Adyrna.kz Telegram
https://www.adyrna.kz/storage/uploads/gNIG7N0pL0opusx8AbsdXKDchzTwn8rTXVVwSX5s.webp

پاۆلودارداعى قارتتار ۇيىندە تۇراتىن ساعادات جۇماباەۆ قاجىلىققا دەپ جيناپ كەلگەن 3,6 ملن تەڭگە قاراجاتىن مۇگەدەك بالالارعا بەردى. اقساقالدىڭ جاسى بۇگىندە 93-تەن اسقان. بۇل تۋرالى قازاقپارات جازدى، دەپ حابارلايدى “ادىرنا”.

 اقپاراتقا سايكەس، جالپى سوماسى 3,6 ملن تەڭگە قاراجاتتى قاريا ون جىل بويى جيناپ كەلىپتى. كەيىنگى ۋاقىتتا دەنساۋلىعى ءجيى سىر بەرۋىنە ءارى جاسىنىڭ ۇلكەندىگىنە بايلانىستى ۇزاق ساپاردان باس تارتۋىنا تۋرا كەلگەن. ايتۋىنشا، ءوزى – تىل ارداگەرى. كولحوزدا جۇمىس ىستەپ، ەكىنشى دۇنيەجۇزىلىك سوعىس جىلدارى جاۋدى جەڭۋ ءۇشىن ايانباي ەڭبەك ەتكەن.

“مەككەگە بارامىن دەپ ۇزاق جىلدار زەينەتاقىمنان جىرىپ اقشا جينادىم. 2022 جىلى شەتەلگە شىعۋ ءۇشىن تولقۇجات الدىم. وكىنىشكە قاراي، سول جىلى قاجىلىققا باراتىنداردىڭ جاسى 65-تەن اسپاۋى كەرەك دەگەن تالاپ قويىلىپ، مەنى تۋروپەراتورلار المادى. ودان سوڭ دەنساۋلىعىم سىر بەرىپ، ءجۇرىپ-تۇرۋىم اۋىرلاي باستاعانىن سەزدىم. ونىڭ ۇستىنە تانىس ادامدار ول جاققا بارۋ ءۇشىن جانىما ادام ەرتىپ ءجۇرۋىم كەرەكتىگىن ايتتى. اقىر-سوڭى قاسيەتتى ساپاردان باس تارتۋىما تۋرا كەلدى”، - دەيدى ساعادات اتا. 

وتاسقان جارىمەن ۇزاق جىل ءتۇتىن تۇتەتكەن. الايدا تاعدىردىڭ جازۋىمەن ارالارىندا بالا بولماعان. 2009 جىلى زايىبى قايتىس بولعان سوڭ جالعىز قالادى. ءىنىسى 69 جاسىندا ومىردەن وزعان. ال اناسى 98 جاسىندا دۇنيە سالىپتى. سوندىقتان ءوزىنىڭ ۇزاق ءومىر ءسۇرۋىنىڭ سىرىن اناسىنىڭ تەگىنەن دارىعان دەپ ەسەپتەيدى.

“كەيىنگى ۋاقىتتا شەشەم تۇسىمە ءجيى كىرەدى. انانىڭ ورنى ىستىق ەكەن، ونى

ۇنەمى ساعىنامىن. ويلانا كەلە، كوپ جىل بويى جيناعان قاراجاتىمدى مۇگەدەك بالا اسىراپ وتىرعان وتباسىلارعا بەرۋدى ۇيعاردىم. جولداستارىمنان سۇراستىرا ءجۇرىپ دەرتكە شالدىققان بالالاردى تاۋىپ، ولاردى اناسىمەن بىرگە ءبىر جەرگە جينادىق. تىرنەكتەپ جيعان 3,6 ملن تەڭگەمدى 120 مىڭ تەڭگەدەن ءبولىپ، 30 بالانىڭ اناسىنا ۇستاتتىم. «قالقالارىم، بۇل – ءتۇن ۇيقىسىن ءتورت ءتولىپ، بالاسىنىڭ ءومىرى ءۇشىن كۇرەسكەن انالار ەڭبەگىنىڭ وتەۋى دەپ تۇسىنىڭدەر» دەپ اتاپ ايتتىم. انانىڭ ايالى الاقانىن، ونىڭ ءوز پەرزەنتىن ءوسىرىپ-جەتكىزۋدەگى ەڭبەگىن دۇنيەدە ەش نارسەمەن ولشەي المايسىڭ”، - دەپ تولعاندى تىل ارداگەرى. 

اقساقال بيىل جەڭىستىڭ 80 جىلىندا تىل ارداگەرى رەتىندە بىرجولعى بيۋدجەتتىك تولەمدى الا الماعانىن ايتادى. تۇرىپ جاتقان قارتتار ءۇيىنىڭ باسشىلىعىنان سۇراعاندا «سىزدەر ونسىز دا مەملەكەتتىڭ قامقورلىعىندا وتىرسىزدار، ونداي تولەم قاراستىرىلماعان» دەپ جاۋاپ بەرىپتى. قاريا جەڭىسكە ۇلەس قوسقان قارتتاردى الالاۋ دۇرىس ەمەس دەپ سانايدى. سوندىقتان بۇل شەشىمگە ءوزىنىڭ قامكوڭىل بولىپ قالعانىن جەتكىزدى. 

“ال قارتتار ۇيىندەگى جالپى جاعداي كوڭىلىمىزدەن شىعادى. قارىن توق، كويلەك كوك. جالعىز ءوزىم ءبىر بولمەدە تۇرىپ جاتىرمىن. قىزمەتكەرلەردىڭ بارلىعى مەيىربان، قامقورلىقپەن قارايدى”، - دەيدى ول. 

 ساعادات اتا قازىرگى تەرەڭكول اۋدانىندا ءشوپ شابۋشى، كولحوز ەسەپشىسى، بريگادير، كىرپىش زاۋىتىنىڭ شەبەرى، قويما مەڭگەرۋشىسى قىزمەتتەرىن اتقارعان. كەيىن پاۆلودارعا كوشىپ كەلىپ، زەينەتكە شىققانعا دەيىن اليۋميني جانە تراكتور زاۋىتتارىندا ەڭبەك ەتكەن. 1988 جىلدان بەرى زەينەتتە.

پىكىرلەر