قازاقستان پرەزيدەنتى قاسىم-جومارت توقاەۆ اقش پرەزيدەنتى دونالد ترامپتىڭ قازاقستاننان يمپورتتالاتىن تاۋارلارعا باج سالىعىن ەنگىزۋ تۋرالى حاتىنا رەسمي جاۋاپ جولدادى، دەپ حابارلايدى "ادىرنا" ۇلتتىق پورتالى.
مەملەكەت باسشىسى ءوز جاۋابىندا قازاقستاننىڭ اقش-پەن اراداعى بۇرىننان قالىپتاسقان سەنىمدى ساۋدا جانە ينۆەستيتسيالىق ارىپتەستىكتى جوعارى باعالايتىنىن اتاپ ءوتتى. پرەزيدەنت توقاەۆ ەكى ەل اراسىنداعى ەكونوميكالىق بايلانىستاردىڭ ءادىل، اشىق ءارى ءوزارا ءتيىمدى نەگىزدە دامۋى قاجەت ەكەنىن ايتتى.
پرەزيدەنت قازاقستاننىڭ ساۋدا ماسەلەلەرى بويىنشا كونسترۋكتيۆتى ديالوگقا اشىق ەكەنىن ءبىلدىرىپ، بارلىق شەشىمدەر راتسيونالدى نەگىزدە قابىلدانۋى كەرەك ەكەنىن جەتكىزدى.
ء “بىز ساۋدا سالاسىنداعى كەز كەلگەن تۇيتكىلدى ورتاق مۇددە مەن تەڭ قۇقىلىق قاعيداتتارى نەگىزىندە شەشۋگە بولادى دەپ سانايمىز. قازاقستان اقش-پەن ءوزارا ءتيىمدى سەرىكتەستىكتى جالعاستىرۋعا بەيىل،” – دەلىنگەن توقاەۆتىڭ جاۋابىندا.
مەملەكەت باسشىسى ساۋدا سالاسىنداعى پروبلەمالاردى بىرلەسىپ شەشۋ ارقىلى ورتاق مامىلەگە كەلۋگە بولادى دەگەن سەنىم ءبىلدىردى.
ايتا كەتەيىك، اقش پرەزيدەنتى دونالد ترامپ 7 شىلدەدە قاسىم-جومارت توقاەۆقا جولداعان حاتىندا 2025 جىلدىڭ 1 تامىزىنان باستاپ قازاقستاننان اكەلىنەتىن بارلىق تاۋارعا 25% كولەمىندە كەدەندىك باج سالىعىن ەنگىزەتىنىن ايتقان ەدى.
