قازاقستان استاناسىندا وتكەن ورتالىق ازيا مەن تمد كەڭىستىگىندەگى ەڭ ءىرى پوپ-مادەنيەت فەستيۆالىندە ەساي مورالەس، بلوگەر ناستيا دجەكسون، ستريمەرلەر، دۋبلياج اكتەرلەرى مەن ءارتۇرلى ەلدەردەن كەلگەن كوسپلەي شەبەرلەرى كورەرمەندەرمەن جۇزدەستى.
فەستيۆالدىڭ ەكىنشى كۇنى «بارىس ارەنا» سپورت كەشەنىندەگى باستى ساحنانىڭ اشىلۋىمەن باستالدى.
مۇز ارەناسىنىڭ ءۇستى ارنايى جابىنمەن جابىلعانمەن، سالقىندىق سەزىلدى. بىراق زالدا كەرىسىنشە ناعىز جىلى اتموسفەرا ورنادى. جانكۇيەرلەر تانىمال بلوگەر ناستيا دجەكسوندى قۋانىشپەن قارسى الدى. ونىڭ YouTube ارناسىندا 2,5 ميلليونعا جۋىق جازىلۋشى بار.
ناستيا ميستيكالىق وقيعالار، قۇپيا تەوريالار مەن ادامنىڭ بويىن تىتىركەندىرەتىن ۆيدەولارىمەن تانىمال. ول جاي عانا ۆيدەو تۇسىرمەيدى، كورەرمەندى وزىنە تارتىپ الاتىن دۇنيە جاسايدى. ونىڭ ۇرانى: «بارلىعى ءبىر كورىنگەننەن بىلىنبەيدى...».
جانكۇيەرلەر ناستيادان سۇيىكتى فيلمدەرى مەن مۋلتفيلمدەرى تۋرالى، يدەيالاردى قايدان الاتىنى جانە بولاشاقتا ءوزىن كىم رەتىندە كورەتىنى جايلى سۇرادى.
«مەن ۇنەمى جازبالار جاساپ وتىرامىن، كومپيۋتەرگە، تەلەفونعا. كۇلكىلى نەمەسە قىزىقتى دۇنيەنى كوزىم شالسا، بىردەن جازىپ الامىن. كەيىن سول جازبالاردان ۆيدەو جاساپ شىعارامىن. TikTok-تا ءبىر ەرەكشە ۆيدەو كورسەم، ونىڭ ارتىندا نە تۇرعانىن زەرتتەپ، سوعان بايلانىستى ۆيدەو-تالداۋ جاسايمىن»، – دەدى ناستيا دجەكسون جانكۇيەرلەرىمەن كەزدەسۋدە.
ونىڭ ايتۋىنشا، ءدال وسى ميستيكالىق تاقىرىپتار مەن ءتۇرلى قۇبىلىستاردى اشكەرەلەۋ — ارنا جانكۇيەرلەرىن بىرىكتىرەتىن نەگىزگى سەبەپ.
سونداي-اق، ناستيا ءبىر قۇپيامەن ءبولىستى. ول كەلەسى ۆيدەوسىندا جاڭا كەيىپكەر پايدا بولۋى مۇمكىن ەكەنىن ايتتى. بۇل كەيىپكەر بۇرىننان بار شەلليگە قوسىلادى.
ال 40 جىلدان استام گولليۆۋدتا جۇمىس ىستەپ كەلە جاتقان اكتەر ەساي مورالەس جانكۇيەرلەرىمەن ءوزىنىڭ ومىرلىك تاجىريبەسى مەن تەرەڭ ويلارىمەن ءبولىستى.
ەساي مورالەس تەرىس كەيىپكەردى ويناۋدىڭ نەگە اكتەر ءۇشىن ۇلكەن سىناق ەكەنىن ءتۇسىندىردى.
«جاعىمسىز كەيىپكەردى ويناۋ – بۇل ۇلكەن قۇرمەت. ويتكەنى باستى كەيىپكەر ءوز جولىندا كەزدەسكەن قيىندىقتاردى جەڭە وتىرىپ، داميدى. ال سول قيىندىقتاردى ءبىز، انتاگونيستەر، تۋعىزامىز»، – دەدى اكتەر.
سونداي-اق، ەساي مورالەس قازاق حالقى مەن پۋەرتو-ريكولىقتار اراسىندا ۇقساستىق كوپ ەكەنىن اتاپ ءوتتى.
فەستيۆال اياسىندا جۇلدىزدار اللەياسىندا جانكۇيەرلەرمەن بەلگىلى بلوگەر-لەتسپلەيشى Marmok, قىتاي-امەريكالىق مودەل، كوسپلەيشى جانە كوستيۋم ديزاينەرى Yaya Han, رەسەيلىك رەجيسسيور، ستسەناريست، ۆيدەوبلوگەر جانە YouTube-تەگى «چيورنىي كابينەت» ارناسىنىڭ اۆتورى ارتيوم گۋتكوۆسكي جانە باسقا دا تانىمال تۇلعالار كەزدەستى.
فەستيۆال قوناقتارى جاڭا داعدىلار مەن شەبەرلىكتىڭ قىر-سىرىن ماستەر-كلاسس ايماعىندا مەڭگەردى. مۇندا قوناقتار قىلىشتاسۋدى، تۇمار مەن كوستيۋم بولشەكتەرىن جاساۋدى، انيمە مەن فيلمدەردى دىبىستاۋدى ۇيرەنە الدى.
اۆتورلار اللەياسى مەن جارمەڭكە ايماعىندا 150-دەن استام قازاقستاندىق سۋرەتشى مەن قولونەر شەبەرى ءوز جۇمىستارىن ۇسىندى. ولار – ءتۇرلى جانردا ەڭبەك ەتەتىن تالانتتى شەبەرلەر.
بيىلعى Comic Con Astana-2025 فەستيۆالى 9-13 شىلدە ارالىعىندا وتۋدە جانە 75 000-نان استام قوناقتى قابىلدايدى. ولاردىڭ ىشىندە كەمىندە 10 000-ى – شەتەلدىك تۋريستەر.
Comic Con Astana-2025 استانا قالاسى اكىمدىگى مەن «Astana Tourism» ءتۋريزمدى دامىتۋ ورتالىعىنىڭ قولداۋىمەن وتۋدە.
