اۋعان تاراپىنىڭ شاقىرۋىمەن قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ جۇمىس ساپارىمەن اۋعانستانعا باردى، دەپ حابارلايدى "ادىرنا" ۇلتتىق پورتالى.
ساپار بارىسىندا مۇرات نۇرتىلەۋ اۋعانستان پرەمەر-ءمينيسترىنىڭ ەكونوميكالىق ماسەلەلەر جونىندەگى ورىنباسارىنىڭ مىندەتىن اتقارۋشى ابدۋل عاني بارادارمەن كەزدەستى. ەكىجاقتى كەلىسسوزدەر بارىسىندا تاراپتار ساۋدا-ەكونوميكالىق، ترانزيتتىك جانە اگرارلىق سالالارداعى، سونداي-اق گەوبارلاۋ مەن تسيفرلاندىرۋ باعىتىنداعى ىنتىماقتاستىقتىڭ كەلەشەگىن تالقىلادى.
مۇرات نۇرتىلەۋ اۋعانستاندى ورتالىق ازيا وڭىرىمەن تاريحي جانە گەوگرافيالىق تۇرعىدان تىعىز بايلانىستى مەملەكەت رەتىندە قاراستىراتىنىن اتاپ ءوتتى. ول سونداي-اق ەلدەر اراسىنداعى سەنىم مەن ارىپتەستىكتى ودان ءارى نىعايتۋعا قازاقستان مۇددەلى ەكەنىن ءبىلدىردى.
ءوز كەزەگىندە ابدۋل عاني بارادار كابۋل مەن استانا اراسىنداعى سەرىكتەستىكتى كەڭەيتۋگە زور الەۋەت بارىن ايتتى. ول بىرلەسكەن ينفراقۇرىلىمدىق جوبالار ارقىلى اۋعانستاندا جاڭا جۇمىس ورىندارىن قۇرۋعا ءۇمىت ارتاتىنىن جەتكىزدى.
كەزدەسۋ قورىتىندىسىندا قازاقستاننىڭ كولىك مينيسترلىگى مەن اۋعانستاننىڭ قوعامدىق جۇمىستار مينيسترلىگى اراسىندا ورتالىق ازيا مەن وڭتۇستىك ازيا اراسىنداعى تەمىرجولدى سالۋ جانە پايدالانۋ بويىنشا نەگىزگى قاعيداتتار تۋرالى ءوزارا تۇسىنىستىك تۋرالى مەموراندۋمعا قول قويىلدى.
ەسكە سالا كەتەيىك، اۋعانستانداعى قازىرگى بيلىك حالىقارالىق دەڭگەيدە تولىق مويىندالماعان. تەك بيىلعى جىلدىڭ شىلدە ايىنىڭ باسىندا عانا ماسكەۋ بيلىگى اۋعانستان يسلام امىرلىگىن رەسمي تۇردە مويىندادى.
