پرەزيدەنت قاسىم-جومارت توقاەۆتىڭ 2025 جىلعا دەيىن 2 ميلليارد اعاش وتىرعىزۋ جونىندەگى تاپسىرماسىنىڭ ورىندالۋ مەرزىمى 2027 جىلعا شەگەرىلدى. ەكولوگيا جانە تابيعي رەسۋرستار ءمينيسترى ەرلان نىسانباەۆ Jibek Joly ارناسىنا بەرگەن سۇحباتىندا پرەزيدەنت تاپسىرماسى نە سەبەپتى ۋاقتىلى ورىندالماعانىن ايتتى، دەپ حابارلايدى «ادىرنا» ءتىلشىسى قازاقپاراتقا سىلتەمە جاساپ.
مينيستر اعاش وتىرعىزۋدىڭ بىرنەشە كەزەڭنەن تۇراتىن كۇردەلى ۇدەرىس ەكەنىن اتاپ ءوتتى. ايتۋىنشا، بۇل ىسكە جوسپار قۇرۋ، تۇقىم دايىنداپ، ونى ساقتاۋ، جەردى وڭدەۋ، كوشەت وتىرعىزۋ جانە كەيىنگى كۇتىم جۇمىستارى كىرەدى.
بىلتىر مەملەكەتتىك ورمان قورىنا 1 ميلليارد 150 ميلليون كوشەت ماتەريالى ەگىلگەن. تاپسىرمانىڭ تولىق كولەمدە ورىنداماۋىنا جەرگىلىكتى اكىمدىكتەردىڭ جەتكىلىكتى دەڭگەيدە اقشا بولمەۋى اسەر ەتكەن.
«مەملەكەت باسشىسىنىڭ تاپسىرماسىن تولىق كولەمدە ورىنداماۋىنا كەلەر بولساق، باستى سەبەپ – جەرگىلىكتى اتقارۋشى ورگاندار تاراپىنان قارجىلاندىرۋدىڭ بولماۋى. باسا ايتقىم كەلەتىنى، مەملەكەتتىك ورمان قورىنىڭ 80 پايىزى اكىمدىكتەردىڭ قاراۋىندا. ولار تۇقىم جيناۋدان باستاپ بارلىق ساتىعا جاۋاپتى. وعان قوسا
ءمينيستردىڭ سوزىنشە، پرەزيدەنت تاپسىراماسىنا دەيىن جىلىنا 50-55 مىڭ گەكتار القاپقا اعاش وتىرعىزىلىپ كەلگەن، قازىر كولەم ەكى ەسەدەن استام ۇلعايدى. سايكەسىنشە، تراكتور، اعاش وتىرعىزۋ تەحنيكالارى مەن جۇمىسشى سانىن ارتتىرۋ كەرەك. تۇقىم كولەمى دە 500 توننادان 1250 تونناعا دەيىن وسكەن.
«تۇقىمسىز كوشەت الۋ مۇمكىن ەمەس، ال تەحنيكاسىز مۇنداي كولەمدەگى تۇقىمدى ەگۋ تۋرالى ءسوزدىڭ ءوزى ارتىق. اتالعان باعىتتاعى جۇمىستار اۆتوماتتاندىرىلماعان، بارىنە جۇمىس كۇشى، تەحنيكا كەرەك ەكەنى تۇسىنىكتى. الەم ەلدەرى دە وسى جولمەن كەلە جاتىر»،- دەپ اتاپ ءوتتى ەرلان نىسانباەۆ.
ايتۋىنشا، 2021-2023 جىلدارى جوسپارلانعان جۇمىستىڭ 70-75 پايىزى ورىندالدى. قالعان بولىگى 2026-2027 جىلدارعا شەگەرىلدى. 2023 جىلدان باستاپ مينيسترلىك تۇقىم جيناۋ ماسەلەسىن قاتاڭ باقىلاۋعا الدى. 10 تامىزعا دەيىن الداعى ەكى جىلعا ارنالعان كوشەت ءوسىرۋ بويىنشا بايانداما جاسالادى.
