اڭىزعا اينالعان ءۇندى مارافونشىسى، «تيۋربان كيگەن تورنادو» لاقاپ اتىمەن تانىلعان فاۋدجا سينگح 114 جاسىندا جول-كولىك وقيعاسىنان قازا تاپتى، دەپ حابارلايدى "ادىرنا" ۇلتتىق پورتالى.
قايعىلى جاعداي ءۇندىستاننىڭ پەندجاب شتاتىنداعى دجالاندحار اۋىلىندا 14 شىلدە كۇنى كۇندىز بولعان. مارافونشى دجالاندحار–پاتحانكوت تاس جولىندا كولىك استىنا ءتۇسىپ، اۋىر باس جاراقاتىن العان. ول شۇعىل تۇردە اۋرۋحاناعا جەتكىزىلگەنىمەن، دارىگەرلەر ونىڭ ءومىرىن ساقتاپ قالا المادى.
مارقۇمدى جەرلەۋ ءراسىمى شەتەلدە تۇراتىن تۋىستارى ەلگە ورالعاننان كەيىن وتەدى.
جەرگىلىكتى بيلىك پەن قوعام قايراتكەرلەرى فاۋدجا سينگحتىڭ قازاسىنا بايلانىستى كوڭىل ايتىپ، ونىڭ ءومىر جولىن ۇرپاققا ۇلگى ەتىپ ەسكە الدى.
فاۋدجا سينگح رەسمي راستالماعان دەرەكتەرگە سايكەس 1911 جىلى دۇنيەگە كەلگەن. ۇزاق جىلدار بويى جەر شارۋاشىلىعىمەن اينالىسقان. 89 جاسىندا العاشقى رەت لوندون مارافونىنا قاتىسىپ، جاسى كەلگەن سپورتشىلار اراسىندا بىرنەشە رەكورد ورناتقان. 2003 جىلى تورونتو مارافونىندا 42 شاقىرىمدى 5 ساعات 40 مينۋتتا جۇگىرىپ وتكەن. سونىمەن قاتار، ول 2004 جىلى افينى مەن 2012 جىلى لوندون وليمپيادالارىندا الاۋ كوتەرۋ راسىمىنە قاتىسقان.
2023 جىلى رەسمي تۇردە سپورتتاعى مانسابىن اياقتاعانىمەن، مارافونشىلارعا قولداۋ كورسەتۋدى جالعاستىرعان. الايدا، ءۇندىستاندا 1911 جىلى تۋ تۋرالى جازبالار بولماعاندىقتان، ونىڭ ناقتى جاسى گيننەستىڭ رەكوردتار كىتابىنا ەنگىزىلمەگەن.
